Një shpërthim i fuqishëm është regjistruar këtë të shtunë në Aeroportin Ndërkombëtar “King Khalid” të Riadit, duke shkaktuar disa të plagosur dhe evakuimin e pasagjerëve nga pjesë të terminalit.
Dëshmitarë në vendngjarje kanë treguar se pas shpërthimit panë disa persona të shtrirë të plagosur në aeroport, ndërsa më shumë se një duzinë ambulancash mbërritën me urgjencë.
Autoritetet saudite nuk kishin dhënë menjëherë një bilanc zyrtar për numrin e të plagosurve apo shkakun e shpërthimit.
Pas incidentit, trafiku ajror në Riad është goditur rëndë. Fluturimet në drejtim të kryeqytetit saudit janë devijuar ose anuluar, ndërsa aeroporti u ka kërkuar pasagjerëve të kontaktojnë kompanitë ajrore dhe të kontrollojnë statusin e fluturimeve përpara se të nisen drejt terminalit.
Kuwait Airways njoftoi anulimin e fluturimeve drejt dhe nga Riadi për shkak të situatës së sigurisë, ndërsa Etihad Airways dhe Qatar Airways kanë anuluar gjithashtu disa linja.
Shpërthimi ndodh në një moment tensioni të lartë në Arabinë Saudite. Aeroporti i Riadit është goditur disa herë gjatë ditëve të fundit nga sulme me raketa të pretenduara nga Huthit e Jemenit. Sulmet e mëparshme kanë shkaktuar viktima, të plagosur dhe dëmtime të avionëve.
Huthit kanë paralajmëruar kompanitë ajrore të shmangin hapësirën ajrore saudite, duke e shpallur atë zonë operacionesh ushtarake pas përshkallëzimit të luftimeve në Jemen.
Ende nuk ka konfirmim se shpërthimi i sotëm është shkaktuar nga një sulm i Huthive. Autoritetet po vijojnë verifikimet për të përcaktuar rrethanat e ngjarjes.
