Vendimi i Dhomave të Specializuara në Hagë ndaj ish-krerëve të Ushtrisë Çlirimtare të Kosovës ka sjellë lëvizje të menjëhershme në skenën politike të Kosovës.

Kryetari i Partisë Demokratike të Kosovës, Bedri Hamza, ka zhvilluar të enjten takime të ndara me tre liderë të partive parlamentare: Albin Kurtin, Lumir Abdixhikun dhe Ardian Gjinin.

Hamza bëri të ditur se takimet janë zhvilluar me kërkesën e tij, pas vendimit të Hagës.

Në fokus të bisedimeve ka qenë situata e krijuar, sfidat me të cilat po përballet Kosova, si edhe mundësitë për bashkëpunim mes forcave politike në këtë periudhë.

“Sot, me kërkesën time, pas vendimit në Hagë, u takova ndaras me tre liderët e partive parlamentare, z. Kurti, z. Abdixhiku dhe z. Gjini. I falënderoj të tre për takimet”, deklaroi Hamza.

Kreu i PDK-së theksoi se bisedimet janë përqendruar te serioziteti i momentit dhe nevoja për koordinim politik.

“Ne biseduam për seriozitetin e situatës së krijuar, sfidat me të cilat po përballemi, si dhe për mundësitë e bashkëpunimit në këtë periudhë të rëndësishme për popullin dhe shtetin tonë”, u shpreh ai.

Takimet mes liderëve vijnë menjëherë pas vendimit të Hagës, në një moment të ndjeshëm për politikën dhe opinionin publik në Kosovë.