Një sulm i ri izraelit në periferinë jugore të Bejrutit ka rritur tensionet në Lindjen e Mesme dhe ka hedhur hije dyshimi mbi marrëveshjen e shumëpritur mes Shteteve të Bashkuara dhe Iranit, e cila pritej të firmosej këtë të diel.
Forcat Mbrojtëse të Izraelit (IDF) njoftuan se goditën një qendër komanduese të Hezbollahut në zonën Dahieh të Bejrutit, pas asaj që i cilësuan si sulme ajrore të grupit libanez ndaj territorit izraelit më herët gjatë ditës.
Reagimi i Teheranit ishte i menjëhershëm. Kryenegociatori iranian Mohammad Bagher Ghalibaf deklaroi se sulmi ndaj kryeqytetit libanez tregon se SHBA-ja nuk po përmbush angazhimet e saj dhe se ose nuk ka vullnetin, ose nuk ka aftësinë për të garantuar zbatimin e marrëveshjeve të diskutuara.
Sipas tij, Irani ka kërkuar vazhdimisht që situata në Liban të jetë pjesë e çdo marrëveshjeje paqeje me Uashingtonin, ndërsa shtoi se “nuk ka kuptim të vazhdohet në këtë rrugë” nëse sulmet vazhdojnë.
Zhvillimet vijnë vetëm një ditë pasi presidenti amerikan Donald Trump deklaroi se marrëveshja për përfundimin e konfliktit me Iranin do të nënshkruhej të dielën. Në një postim në Truth Social, Trump tha se marrëveshja do të garantonte hapjen e menjëhershme të Ngushticës së Hormuzit për të gjithë dhe do të siguronte që Irani të mos zhvillojë kurrë armë bërthamore.
Megjithatë, Ministria e Jashtme iraniane ka treguar rezervë për afatet e nënshkrimit, duke deklaruar se mbetet për t’u parë data e saktë e finalizimit të marrëveshjes.
Sulmi në Bejrut dhe reagimi i ashpër i Teheranit rrezikojnë të komplikojnë negociatat që prej javësh po zhvillohen me ndërmjetësimin e Pakistanit, i cili kishte njoftuar se palët po përgatiteshin për nënshkrimin elektronik të marrëveshjes.
