Një protestë është zhvilluar këtë të enjte në Sheshin Skënderbej, ku qytetarë nga e gjithë Shqipëria, aktivistë për mbrojtjen e kafshëve dhe vullnetarë u bashkuan në thirrjen e tyre të fortë: “Mjaft më!”. Qëllimi i protestës ishte kundërshtimi i praktikave çnjerëzore që, sipas denoncimeve të shumta, prej vitesh po kryhen ndaj qenve endacakë në territorin shqiptar.
Thirrje për hetim, transparencë dhe ndalimin e abuzimeve
Protestuesit kërkuan hetim të thelluar mbi dhjetëra raste të helmimeve, zhdukjeve dhe trajtimeve çnjerëzore të qenve endacakë — shumë prej tyre, sipas raportimeve, të kryera me fonde publike dhe pa asnjë përgjegjësi ligjore. Aktivistë dhe përfaqësues të organizatave të mbrojtjes së kafshëve paralajmëruan se ky fenomen është përshkallëzuar ndjeshëm muajt e fundit.
“Abuzimet nuk janë raste të izoluara”
Sipas aktivistëve, mbërrijnë çdo ditë dhjetëra denoncime për:
helmime të koordinuara në zona urbane,
zhdukje të qenve pa asnjë dokumentim,
kushte të papërshtatshme në strehat veterinare,
abuzime nga punonjës të shërbimeve bashkiake,
mungesë të plotë transparence mbi fondet dhe trajtimin e kafshëve të kapura.
Organizatat theksojnë se ligji për mbrojtjen e kafshëve ekziston, por nuk zbatohet. Në disa raste, shkeljet kryhen pikërisht nga strukturat që duhet të garantojnë respektimin e tij.
Aktivisti i njohur për mbrojtjen e kafshëve Indrit Osmani denoncoi në “Aldo Morning Show” se helmimet janë kryer nga punonjës zyrtarë të shtetit, të cilët — sipas tij — shpërndajnë salsiçe të mbushura me helm në ambjentet publike.
“Kjo nuk është ngjarje e izoluar. Kafshët helmohen me metoda të koordinuara, madje në orar zyrtar. Ky është një akt i rëndë publik dhe institucionet nuk kanë reaguar,” — deklaroi Osmani.
Ai theksoi se viktima nuk janë vetëm kafshët endacake, por edhe ato me pronarë, duke e cilësuar situatën një rrezik serioz për komunitetin.
Kërkesat zyrtare të protestuesve
Aktivistët kanë paraqitur një listë me kërkesa drejtuar institucioneve shqiptare dhe partnerëve ndërkombëtarë:
Ndalimi i menjëhershëm i helmimeve dhe çdo forme të zhdukjes së qenve endacakë.
Ndjekje penale dhe largim nga detyra për çdo punonjës publik që kryen krime ndaj kafshëve.
Hetim nga SPAK për fondet e bashkive dhe transparencë mbi numrin e qenve të kapur dhe trajtimin e tyre.
Përfshirjen e strukturave të BE-së për forcimin dhe zbatimin real të legjislacionit.
Mbështetje nga organizatat dhe ambasadat e huaja për garantimin e standardeve humane.
Akses i përditshëm për vullnetarët në Strehën Veterinare të Tiranës dhe në çdo qytet.
Një thirrje kombëtare për drejtësi
Protesta e 20 nëntorit synon të kthehet në një pikë kthese në trajtimin e kafshëve endacake në Shqipëri. Aktivistët theksojnë se kjo çështje nuk është thjesht humane, por edhe ligjore dhe morale.
Organizatorët ftojnë që protesta të vijojë me presion publik dhe monitorim të veprimeve institucionale, duke theksuar se vetëm nëse zëri i qytetarëve dëgjohet sot, mund të ndalet dhuna sistematike ndaj kafshëve nesër.
