Bashkimi Demokratik për Integrim ka reaguar ashpër ndaj qëndrimeve të partive politike maqedonase pas vendimit të Dhomave të Specializuara në Hagë për ish-drejtuesit e Ushtrisë Çlirimtare të Kosovës.
BDI akuzon partitë maqedonase se po përpiqen të barazojnë dy institucione krejtësisht të ndryshme: Tribunalin Penal Ndërkombëtar për ish-Jugosllavinë dhe Dhomat e Specializuara të Kosovës.
Sipas BDI-së, një krahasim i tillë është juridikisht i pasaktë dhe rrezikon që një proces gjyqësor ende të papërfunduar të shndërrohet në një verdikt politik mbi UÇK-në.
“Drejtësia nuk mbrohet me standarde të dyfishta”, është në thelb mesazhi i partisë shqiptare në Maqedoninë e Veriut, e cila kërkon respektimin e së drejtës së ankesës dhe të gjithë procedurës gjyqësore.
BDI thekson se Tribunali për ish-Jugosllavinë ishte një gjykatë ndërkombëtare e krijuar nga Këshilli i Sigurimit i OKB-së. Kjo është e konfirmuar edhe nga dokumentacioni zyrtar i ICTY-së: Tribunali u krijua më 25 maj 1993 me Rezolutën 827 të Këshillit të Sigurimit.
Ndërsa Dhomat e Specializuara kanë një bazë tjetër juridike. Ato u krijuan mbi bazën e një marrëveshjeje ndërkombëtare të ratifikuar nga Kuvendi i Kosovës, ndryshimeve kushtetuese dhe ligjit të miratuar në Kosovë, megjithëse selia dhe personeli i tyre janë në Hagë.
Pikërisht këtë dallim BDI e vendos në qendër të reagimit të saj.
Partia deklaron gjithashtu se ICTY, përmes proceseve të zhvilluara për krimet e luftës në ish-Jugosllavi, nuk mund të barazohet me Specialen dhe se vendimet e një institucioni nuk mund të përdoren automatikisht për të interpretuar natyrën juridike apo historike të proceseve të institucionit tjetër.
BDI shkon edhe më tej, duke e cilësuar vendimin e 16 shtatorit 2026 si një vendim që, sipas saj, është “tjetërsuar dhe sajuar”, por thekson se respektimi i drejtësisë nënkupton edhe respektimin e plotë të procesit të apelimit.
“Çdo përpjekje për ta politizuar drejtësinë, për të manipuluar faktet apo për të barazuar procese juridikisht të ndryshme vetëm sa i rrit tensionet dhe krijon terren për përplasje të panevojshme ndëretnike”, thuhet në reagimin e BDI-së.
Reagimi vjen në një klimë të tensionuar politike pas aktgjykimit ndaj Hashim Thaçit, Kadri Veselit, Jakup Krasniqit dhe Rexhep Selimit, ndërsa debati për mënyrën se si duhet lexuar vendimi ka kaluar tashmë përtej kufijve të Kosovës.
