Seriali i ri misterioz “I Will Find You” është kthyer në fenomenin më të ri të Netflix, duke regjistruar plot 24 milionë shikime në vetëm katër ditët e para të publikimit. Sipas platformës, ky është debutimi më i suksesshëm i një seriali të ri gjatë vitit 2026.
Në rolin kryesor interpreton Sam Worthington, i cili luan David Burroughs, një baba i dënuar me burgim të përjetshëm për vrasjen e djalit të tij pesë vite më parë. Edhe pse ai ka këmbëngulur gjithmonë se është i pafajshëm, jeta e tij ndryshon kur kunata e tij, Rachel, e interpretuar nga Britt Lower, i sjell prova që sugjerojnë se djali mund të jetë ende gjallë.
Ky zbulim e shtyn Davidin të arratiset nga burgu për të zbuluar të vërtetën, duke u përfshirë në një histori plot mister, sekrete dhe kthesa të papritura.
“I Will Find You” është ekranizimi më i ri i një romani të shkrimtarit të njohur Harlan Coben, i cili vijon bashkëpunimin e suksesshëm me Netflix. Deri më tani, platforma ka sjellë në ekran 13 vepra të autorit, shumë prej të cilave janë kthyer në hite globale.
Në renditjen javore të Netflix për serialet në gjuhën angleze, pas “I Will Find You” renditen “Outlast: The Jungle”, “Sweet Magnolias” dhe “America’s Sweethearts: Dallas Cowboys Cheerleaders”.
Ndërkohë, në kategorinë e përgjithshme të serialeve, “Teach You a Lesson” ka regjistruar 11.8 milionë shikime, ndërsa “The Polygamist” mban vendin pasues me 7.7 milionë shikime në javën e dytë të transmetimit.
Me suksesin e menjëhershëm dhe interesin e madh të publikut, “I Will Find You” pritet të mbetet për javë me radhë ndër serialet më të ndjekura në Netflix.
