Vala rekord e të nxehtit që ka përfshirë Europën Perëndimore është praktikisht e pamundur të kishte ndodhur pa ndikimin e ndryshimeve klimatike të shkaktuara nga aktiviteti njerëzor. Në këtë përfundim arrin një analizë e publikuar nga grupi shkencor World Weather Attribution (WWA).
Sipas studiuesve, temperaturat ekstreme të natës që po regjistrohen këtë javë janë bërë rreth 100 herë më të mundshme krahasuar me vetëm dy dekada më parë, si pasojë e ngrohjes globale.
Analiza thekson se kjo është vala më e rëndë e të nxehtit e regjistruar ndonjëherë në rajonin e studiuar. Nëse një fenomen i ngjashëm do të kishte ndodhur në vitin 1976, temperaturat do të ishin mesatarisht rreth 3.5 gradë Celsius më të ulëta se ato që po përjeton Europa sot.
Nga më shumë se 800 qytete europiane të analizuara, 45% kanë regjistruar ose pritet të regjistrojnë nivelin më të lartë të stresit termik për fundin e muajit qershor. Ky fenomen ndodh kur organizmi nuk arrin më të ftohet në mënyrë efektive përmes djersitjes, duke rritur ndjeshëm rrezikun për shëndetin.
Shkencëtarët theksojnë se emetimet e gazeve serrë, të krijuara kryesisht nga djegia e qymyrit, naftës dhe gazit, kanë rritur temperaturën mesatare të planetit me rreth 1.4 gradë Celsius krahasuar me periudhën para-industriale.
“Ne nuk po bëjmë mjaftueshëm për të ngadalësuar ritmin e ngrohjes globale. Për sa kohë kjo vazhdon, duhet të presim që rekordet e temperaturave të thyhen gjithnjë e më shpesh”, tha Clair Barnes, studiuese në Imperial College London dhe bashkautore e analizës.
Ekspertët paralajmërojnë se pasojat për shëndetin sapo kanë filluar të shfaqen. Një studim i mëparshëm ka treguar se mbi 60 mijë persona humbën jetën si pasojë e valëve të të nxehtit në Europë gjatë verës së vitit 2022.
Një shqetësim i veçantë mbeten temperaturat shumë të larta gjatë natës. Në disa zona të Francës, temperaturat nuk kanë zbritur nën 20 gradë Celsius për më shumë se një javë, ndërsa në disa raste minimumet gjatë natës kanë arritur pothuajse 30 gradë, duke e bërë shumë të vështirë rikuperimin e organizmit nga nxehtësia e ditës.
Sipas analizës, fenomeni klimatik El Niño nuk ka pasur rol në këtë valë ekstreme të të nxehtit. Shkencëtarët theksojnë se shkaktari kryesor mbetet ndryshimi klimatik i nxitur nga aktiviteti njerëzor.
