Kompania hapësinore SpaceX debutoi këtë të premte në bursën amerikane Nasdaq, në atë që konsiderohet oferta publike fillestare më e madhe në histori.
Kompania e themeluar nga Elon Musk ka mbledhur 75 miliardë dollarë nga shitja e aksioneve, duke thyer rekordin e mëparshëm të vendosur nga gjiganti saudit i naftës Saudi Aramco në vitin 2019.
Aksionet u ofruan me çmimin fillestar prej 135 dollarësh, por kërkesa e lartë nga investitorët ka ngritur pritshmëritë që ato të hapen rreth 171 dollarë për aksion. Në këtë skenar, vlera e tregut e SpaceX mund të arrijë në rreth 2.2 trilionë dollarë.
Musk zotëron mbi 80% të kompanisë dhe një rritje e tillë e vlerësimit do ta çonte pasurinë e tij personale mbi 1 trilion dollarë, duke e bërë njeriun e parë në histori që arrin këtë nivel pasurie.
SpaceX kontrollon gjithashtu një pjesë të aktiviteteve të tjera të Musk, përfshirë kompaninë e inteligjencës artificiale xAI dhe shërbimin satelitor të internetit Starlink.
Megjithatë, analistët paralajmërojnë se entuziazmi i madh rreth inteligjencës artificiale dhe teknologjive të së ardhmes ka ngritur shqetësime për një mbivlerësim të mundshëm të kompanive të sektorit. Institucione financiare dhe ekspertë të tregut kanë paralajmëruar se një korrigjim i fortë i vlerave mund të trondisë bursat globale.
Pavarësisht optimizmit, SpaceX nuk ka raportuar ende fitime të qëndrueshme dhe në dokumentet e saj zyrtare pranon se mund të mos arrijë rentabilitet edhe në të ardhmen.
Gjatë ceremonisë së debutimit në bursë, Musk kujtoi fillimet modeste të kompanisë dhe deklaroi se objektivi afatgjatë mbetet dërgimi i njerëzve në Hënë, Mars dhe më tej në Sistemin Diellor.
