Vetëm pak ditë para finales së Kupës së Botës 2026 mes Argjentinës dhe Spanjës, autoritetet në Nju Jork dhe Nju Xhersi kanë shpallur alarm për cilësinë e ajrit për shkak të tymit të ardhur nga zjarret masive në Kanada.
Mjegulla e dendur ka mbuluar rajonin e Nju Jorkut, duke detyruar autoritetet t’u bëjnë thirrje qytetarëve të kufizojnë aktivitetet në ambient të hapur dhe, kur është e mundur, të qëndrojnë brenda.
Finalja e Botërorit do të zhvillohet të dielën, më 19 korrik, në stadiumin “New York New Jersey Stadium” në East Rutherford, me mbi 80 mijë spektatorë të pritur në tribuna.
Kombëtarja e Spanjës mbërriti në Nju Xhersi të mërkurën mbrëma dhe zhvilloi stërvitjen e së enjtes në ambient të hapur, pa shprehur shqetësime publike për kushtet atmosferike. Ndërkohë, Argjentina qëndroi në Georgia pas fitores ndaj Anglisë dhe pritet të nisë përgatitjet në Nju Xhersi të premten.
Ndikimi i ajrit të ndotur është ndier edhe nga sportistët. Futbollistja amerikane Trinity Rodman deklaroi se ndeshja e kampionatit amerikan të zhvilluar të mërkurën në Nju Jork nuk duhej të ishte luajtur për shkak të cilësisë së dobët të ajrit.
Megjithatë, organizatorët nuk kanë dhënë asnjë sinjal se finalja e Botërorit mund të shtyhet ose të ndryshojë, pasi parashikimet meteorologjike tregojnë se cilësia e ajrit pritet të përmirësohet të premten, ndërsa reshjet e shiut të së shtunës mund të ndihmojnë në shpërndarjen e tymit.
