Poetja dhe shkrimtarja kanadeze Anne Carson është shpallur fituese e Çmimit Nobel për Letërsi për vitin 2026.
Akademia Suedeze e vlerësoi Carson “për veprën e saj të guximshme dhe novatore, e cila, në dialog lozonjar me traditën klasike, ka krijuar forma të reja për letërsinë bashkëkohore”.
Carson, e lindur në Toronto, njihet për stilin e saj të veçantë që ndërthur poezinë, prozën, dialogun dhe përkthimin, duke sfiduar shpesh kufijtë tradicionalë të zhanreve letrare.
Në krijimtarinë e saj zënë një vend të rëndësishëm letërsia dhe mitologjia e Greqisë së lashtë. Ndër veprat më të njohura të autores janë “Autobiography of Red”, “Eros the Bittersweet”, “Men in the Off Hours” dhe “Norma Jeane Baker of Troy”.
Sipas Akademisë Suedeze, Carson ndodhej në Islandë kur mori lajmin për çmimin.
Nobeli për Letërsi shoqërohet këtë vit me një shpërblim prej 12 milionë koronash suedeze, rreth 1.2 milionë dollarë, si dhe me medaljen dhe diplomën Nobel.
Anne Carson pason shkrimtarin hungarez László Krasznahorkai, fituesin e Nobelit për Letërsi në vitin 2025.
