Të paktën 32 persona kanë humbur jetën dhe rreth 700 të tjerë janë plagosur pas dy tërmeteve të fuqishme që goditën Venezuelën, duke shkaktuar shembje ndërtesash dhe dëme të mëdha në kryeqytetin Caracas.
Sipas autoriteteve venezueliane, lëkundjet me magnitudë 7.2 dhe 7.5 goditën zonën në perëndim të kryeqytetit, ndërsa u ndjenë deri në Bogota të Kolumbisë. Tërmetet ndodhën brenda një minute nga njëri-tjetri, duke shkaktuar panik te banorët, shumë prej të cilëve kaluan natën jashtë nga frika e paslëkundjeve.
Në Caracas, ekipet e shpëtimit po kërkojnë persona të mbetur nën rrënoja, ndërsa dëshmitarë kanë raportuar se janë dëgjuar thirrje për ndihmë nga ndërtesat e shembura. Disa zona kanë mbetur pa energji elektrike, metroja është mbyllur plotësisht, ndërsa aeroporti kryesor ndërkombëtar Maiquetía është pezulluar për shkak të dëmtimeve serioze.
Presidentja në detyrë, Delcy Rodríguez, shpalli gjendjen e emergjencës kombëtare dhe bëri të ditur bilancin paraprak të viktimave dhe të plagosurve. Ajo tha se autoritetet po punojnë për vlerësimin e dëmeve dhe koordinimin e ndihmës.
Shtetet e Bashkuara kanë njoftuar se do të dërgojnë menjëherë ekipe kërkim-shpëtimi, ndihma mjekësore dhe asistencë humanitare në Venezuelë. Edhe disa vende të Amerikës Latine kanë ofruar mbështetje për përballimin e pasojave të tërmetit.
Ekspertët paralajmërojnë se paslëkundje të tjera janë të mundshme, ndërsa autoritetet u kanë bërë thirrje qytetarëve të shmangin hyrjen në ndërtesat e dëmtuara derisa të përfundojnë verifikimet e sigurisë.
