Një tërmet i fuqishëm me magnitudë 7.1 goditi Venezuelën në orët e para të së enjtes, duke shkaktuar shembjen e disa ndërtesave dhe panik te banorët e kryeqytetit, Caracas. Goditja i pasua nga një tjetër me magnitudë 7.5
Sipas Shërbimit Gjeologjik të SHBA-së (USGS), epiqendra e tërmetit ishte rreth 28 kilometra në perëndim të qytetit Morón, në bregdetin e Karaibeve, në një thellësi prej 13 kilometrash.
Në Caracas, banorët dolën me nxitim nga shtëpitë dhe ndërtesat, ndërsa të paktën dy objekte u shembën në zonën e Los Palos Grandes, në komunën Chacao, sipas raportimeve të mediave lokale.
Lëkundjet u ndjenë edhe në Kolumbi, përfshirë Bogotán, Barranquillën dhe Bucaramangën, ku qytetarët raportuan lëkundje të forta dhe të zgjatura të ndërtesave.
Autoritetet shpallën fillimisht alarm për cunami për Porto Rikon dhe Ishujt Virgin por pas vlerësimeve të mëtejshme ai u anulua.
Deri tani nuk ka një bilanc zyrtar për viktima apo të plagosur, ndërsa autoritetet venezueliane vijojnë verifikimet për dëmet e shkaktuara nga tërmeti.
