Hantavirusi, që sot po alarmon botën pas shpërthimit të rasteve në anijen turistike “MV Hondius”, rezulton se është identifikuar në Shqipëri që mbi 40 vite më parë. Rasti i parë i dokumentuar daton në vitin 1985 dhe u publikua në revistën prestigjioze mjekësore The Lancet më 21 nëntor 1987.
Studimi me titull “Haemorrhagic fever with renal syndrome in a case in northern Albania” përshkruan rastin e një 27-vjeçari nga veriu i Shqipërisë, i cili u shtrua në spital me temperaturë të lartë, dhimbje koke, barku dhe shpine, si edhe të vjella.
Sipas raportit shkencor, gjendja e tij u përkeqësua me shpejtësi brenda pak ditësh. Pacienti shfaqi hemorragji, probleme të rënda me veshkat dhe kaloi në gjendje shoku, duke u transferuar në terapi intensive dhe duke iu nënshtruar hemodializës. Pas një rikuperimi të gjatë, ai arriti të mbijetonte pa pasoja të mëtejshme.
Rasti është rikthyer në vëmendje edhe nga epidemiologia e njohur Silva Bino, e cila publikoi detaje nga studimi në rrjetet sociale. Autorët e raportit ishin E. Eltari, M. Nuti, I. Hasko dhe A. Gina.
Hantavirusi transmetohet kryesisht nga brejtësit dhe konsiderohet një infeksion potencialisht i rrezikshëm, pasi mund të shkaktojë komplikacione serioze në veshka dhe sistemin e qarkullimit të gjakut.
Virusi është rikthyer në fokus ditët e fundit pas alarmit në kroçerën “MV Hondius”, ku janë raportuar viktima dhe raste të dyshuara infektimi, duke detyruar autoritetet spanjolle të organizojnë operacione evakuimi dhe karantinimi të pasagjerëve.
