Kryetari i Grupit Parlamentar të Partisë Socialiste, Taulant Balla dhe Kryetari i Komisionit për Europën dhe Punët e Jashtme, Igli Hasani gjatë qendrimit në Berlin zhvilluan një takim me Rita Schwarzelühr-Sutter, Sekretare Shteti në Ministrinë Federale të Gjermanisë për Mjedisin, Klimën, Konservimin e Natyrës dhe Sigurinë Nukleare.
Përmes një postimi në rrjetet sociale, Balla shkruan se në fokus të bisedimeve ishte avancimi i Shqipërisë në negociatat me Bashkimi Evropian, veçanërisht për Kapitullin 27 – Mjedisi dhe Ndryshimet Klimatike, i konsideruar një nga kapitujt më të rëndësishëm dhe sfidues të procesit të integrimit.
Gjatë takimit u vlerësua mbështetja e vazhdueshme e Gjermania ndaj rrugës evropiane të Shqipërisë, si dhe bashkëpunimi mes dy vendeve për avancimin e reformave dhe përmbushjen e standardeve të BE-së.
Balla shprehu mirënjohjen për partneritetin e fortë me Gjermaninë, duke theksuar rëndësinë e mbështetjes gjermane në procesin e integrimit evropian të Shqipërisë.
