Një rast i dyshuar helmimi i disa fëmijëve në një kopsht në Korçë ka ngritur shqetësimin e prindërve. Nëna e një prej të miturve ka treguar se simptomat nisën disa orë pasi fëmijët ishin larguar nga kopshti, ndërsa disa prej tyre u dërguan në urgjencë.
Në një rrëfim për Euronews Albania, ajo tha se djali i saj fillimisht ishte në gjendje të mirë. Pasi u kthye në shtëpi, u ankua për dhimbje barku, por shqetësimi dukej se kishte kaluar dhe fëmija shkoi edhe në stërvitje.
Alarmi erdhi nga grupi i prindërve në WhatsApp. Nëna pa se disa prej tyre po shkruanin se fëmijët kishin të vjella dhe dhimbje barku.
“Më thanë që i kishin çuar në urgjencë sepse fëmijët ishin goxha rëndë”, tregoi ajo, duke shtuar se më pas shkoi ta merrte djalin nga stërvitja për ta mbajtur nën vëzhgim.
Gjendja e tij nuk u rëndua, por rreth orës 04:00 të mëngjesit pati të vjella. Gjatë së shtunës, sipas nënës, fëmija ishte i lodhur dhe i zverdhur në fytyrë.
“Fatmirësisht gjendja e tij është shumë mirë”, tha ajo.
Nga informacioni i publikuar nuk bëhet e ditur sa është numri i përgjithshëm i fëmijëve që kanë shfaqur simptoma, cili kopsht është përfshirë dhe as shkaku i dyshuar i helmimit. Për këtë arsye, mbetet për t’u përcaktuar nëse shqetësimet janë shkaktuar nga ushqimi apo nga një faktor tjetër.
