Presidenti i SHBA-së, Donald Trump, ka njoftuar se CNN, MS NOW dhe Politico nuk do të lejohen më në Shtëpinë e Bardhë, duke e bërë vendimin publik përmes një postimi në Truth Social.
Trump tha se masa hyn në fuqi “menjëherë” dhe i akuzoi këto media se publikojnë, sipas tij, lajme të rreme për të, administratën dhe SHBA-në. Ai paralajmëroi gjithashtu se lista mund të zgjerohet me media të tjera.
Nuk është ende e qartë se si do të zbatohet praktikisht ndalimi dhe nëse do të prekë aksesin e gazetarëve të këtyre mediave në konferencat, aktivitetet apo ambientet e Shtëpisë së Bardhë.
CNN, MS NOW dhe Politico nuk kishin dhënë menjëherë një reagim publik për vendimin.
Vendimi vjen pas përplasjeve të tjera mes administratës Trump dhe mediave. Në vitin 2025, Shtëpia e Bardhë kufizoi aksesin e gazetarëve të Associated Press në disa aktivitete presidenciale pas mosmarrëveshjes për emërtimin e Gjirit të Meksikës.
