Rajoni i Marche-s në Itali ka paraqitur një propozim për vendosjen e një licence të detyrueshme për personat që mbajnë qen, duke parashikuar një proces trajnimi për pronarët.
Nisma synon t’u mësojë qytetarëve mënyrën e duhur të kujdesit dhe menaxhimit të kafshëve, me qëllim parandalimin e keqtrajtimit, braktisjes dhe incidenteve në hapësirat publike.
Propozimi ka shkaktuar debat dhe kundërshtime të shumta në rrjetet sociale. Kritikët e konsiderojnë një detyrim të tepruar, ndërsa mbështetësit argumentojnë se mbajtja e një qeni kërkon njohuri, kohë dhe përgjegjësi.
Diskutimi zhvillohet në një kohë kur strehimoret italiane vijojnë të përballen me raste të shumta braktisjeje. Në familjet italiane jetojnë rreth 9,1 milionë qen, por çdo vit dhjetëra mijëra kafshë përfundojnë në rrugë ose në strehimore.
Në strehimoren ndërkomunale të Querciaferrata-s, pranë Ascolit, numri i qenve ka rënë nga rreth 150 në 68, falë punës së shoqatave vullnetare dhe programeve të birësimit.
Përgjegjësja e strukturës, Barbara Bruni, tha se temperaturat e larta gjatë verës ndikuan negativisht te birësimet, pasi shumë familje shtynë vizitat në strehimore.
“Vapa e madhe i frenoi vizitat, por prej disa ditësh interesi ka filluar të rikthehet”, deklaroi ajo.
Strehimorja përdor një sistem që nuk përfundon me dorëzimin e kafshës te familja e re. Edukatorë dhe instruktorë profesionistë ndihmojnë pronarët gjatë përshtatjes së qenit në shtëpi, për të shmangur problemet që mund të çojnë në rikthimin ose braktisjen e tij.
Objektivi i autoriteteve dhe shoqatave është zvogëlimi i numrit të kafshëve në strehimore, por edhe garantimi që birësimet të jenë të sigurta dhe të qëndrueshme.
Burimi: Il Resto del Carlino
