Një tërmet i fuqishëm me magnitudë 7.4 ka goditur Kolumbinë, duke shkaktuar të paktën 111 viktima, dhjetëra të plagosur dhe dëme të mëdha në disa zona të vendit. Autoritetet kanë shpallur gjendjen e fatkeqësisë kombëtare, ndërsa bilanci mbetet provizor dhe mund të rëndohet.
Epiqendra e tërmetit ishte pranë San José del Palmar, në departamentin Chocó, në veriperëndim të Kolumbisë. Lëkundja u regjistrua në një thellësi prej 82 kilometrash dhe u ndje në një territor të gjerë, nga Bogota dhe Cali deri në Quito të Ekuadorit dhe Panama.
Situata paraqitet veçanërisht e rëndë në Cali, ku kryebashkiaku Alejandro Eder ka njoftuar shembjen e të paktën 20 ndërtesave. Nën rrënoja dyshohet se ndodhen ende njerëz.
Alarmi më i madh vjen nga klinika Valle Salud, ku pjesë të godinës janë shembur dhe raportohet se mes personave të bllokuar ka edhe fëmijë. Një kirurg i spitalit ka bërë thirrje publike për ndihmë, duke deklaruar se pacientë të terapisë intensive kanë mbetur të bllokuar.
View this post on Instagram
Dëme të konsiderueshme raportohen edhe në Pereira, Quibdó dhe Manizales. Autoritetet kanë konfirmuar gjithashtu dëmtimin e të paktën gjashtë aeroporteve: Pereira, Manizales, Quibdó, Armenia, Cartago dhe Buenaventura. Fluturimet në këto aeroporte janë pezulluar deri në verifikimin e sigurisë së infrastrukturës.
Tërmeti ka shkaktuar edhe rrëshqitje dheu dhe rënie shkëmbinjsh, duke detyruar autoritetet të mbyllin disa akse të rëndësishme rrugore.
Presidenti Abelardo De la Espriella deklaroi gjendjen e fatkeqësisë kombëtare dhe njoftoi se do të udhëtojë drejt Pereiras për të ndjekur nga afër operacionet e emergjencës.
“Ju nuk jeni vetëm. Shteti është i pranishëm dhe po ndërhyn”, deklaroi presidenti.
Pas goditjes kryesore janë regjistruar të paktën dy pasgoditje, ndërsa autoritetet detare kanë përjashtuar rrezikun e një cunami.
Sipas raportimit të La Repubblica, kjo është goditja më e fuqishme sizmike që ka përjetuar Kolumbia që prej vitit 1979.
