Vala ekstreme e të nxehtit që ka përfshirë Japoninë ka shkaktuar edhe viktima mes kafshëve. Tre luanë kanë ngordhur në Kopshtin Zoologjik Tama në Tokio, ndërsa autoritetet dyshojnë se shkaku kryesor ka qenë goditja nga i nxehti dhe lagështia e lartë.
Sipas drejtuesve të kopshtit zoologjik, problemet nisën në mesin e korrikut, kur disa luanë ndaluan së ushqyeri dhe u bënë aq të plogësht sa nuk mund të lëviznin. Nga 10 luanë që u prekën, tre ngordhën duke filluar nga 28 korriku, ndërsa të tjerët po marrin trajtim dhe disa prej tyre kanë filluar të rikuperohen.
“Për fat të keq, tre luanë humbën jetën. Besojmë se temperaturat ekstreme dhe rritja e menjëhershme e vapës kanë ndikuar drejtpërdrejt në gjendjen e tyre”, deklaroi Masato Nakamura, përgjegjës për edukimin dhe marrëdhëniet me publikun në Kopshtin Zoologjik Tama.
Pas ngjarjes, zona e luanëve është mbyllur për vizitorët, ndërsa stafi ka instaluar ventilatorë të mëdhenj dhe ka shtuar masat për mbrojtjen e kafshëve.
Japonia përjetoi verën më të nxehtë të regjistruar ndonjëherë vitin e kaluar, ndërsa javët e fundit temperaturat në disa rajone kanë arritur deri në 40 gradë Celsius, duke shtuar shqetësimet për pasojat e ndryshimeve klimatike.
