Dhoma e Përfaqësuesve në Shtetet e Bashkuara ka votuar për t’i dhënë fund një bllokimi të pjesshëm të qeverisë që zgjati 76 ditë, i shkaktuar nga përplasjet politike mbi politikat e emigracionit të Presidentit Donald Trump.
Ligjvënësit miratuan një projektligj të kaluar më herët nga Senati për financimin e Departamentit të Sigurisë Kombëtare (DHS), duke ia dërguar për firmë presidentit.
Megjithatë, marrëveshja nuk përfshin financim për agjencitë kryesore të zbatimit të emigracionit, si ICE dhe pjesë të CBP, të cilat kanë qenë në qendër të debatit politik.
Demokratët refuzuan financimin e tyre, duke kërkuar reforma pas dy incidenteve me të shtëna në Minnesota që përfshinin agjentë federalë të emigracionit. Nga ana tjetër, republikanët këmbëngulën për financim të plotë, çka çoi në një ngërç të gjatë.
Ndërkohë, një projektligj tjetër për financimin e këtyre agjencive është ende në shqyrtim në Kongres.
Bllokimi kishte shkaktuar probleme serioze në funksionimin e sistemit, përfshirë vonesa të gjata në aeroporte dhe mungesë pagesash për disa punonjës. Me miratimin e ligjit, punonjësit e sigurisë do të mund të marrin pagat e tyre dhe operacionet pritet të normalizohen.
Administrata kishte paralajmëruar se fondet emergjente po shteronin, ndërsa presioni për zgjidhje u rrit edhe më shumë pas një incidenti të armatosur në Uashington, ku sipas prokurorëve një person tentoi të sulmonte presidentin.
Kryetari i Dhomës së Përfaqësuesve, Mike Johnson, deklaroi pas votimit se “të gjithë punonjësit do të marrin pagat e tyre” dhe se situata në aeroportet amerikane do të stabilizohet.
