Qeveria britanike ka rritur nivelin e kërcënimit terrorist nga “i konsiderueshëm” në “i lartë”, duke paralajmëruar se një sulm është shumë i mundshëm në muajt në vijim.
Vendimi vjen pas një sulmi me thikë në veri të Londrës, në zonën Golders Green, ku dy burra hebrenj u plagosën rëndë. Policia metropolitane e ka cilësuar ngjarjen si akt terrorist.
Autoritetet theksuan se rritja e nivelit të alarmit nuk lidhet vetëm me këtë incident, por edhe me shtimin e kërcënimeve nga ekstremizmi islamist dhe ai i djathtë.
Ministrja e Brendshme, Shabana Mahmood, u shpreh se vendimi do të shkaktojë shqetësim, sidomos te komuniteti hebre, i cili sipas saj ka qenë shpesh në shënjestër të sulmeve.
Policia antiterrorizëm deklaroi se kërcënimi është rritur gradualisht dhe se ka një shtim të rasteve që lidhen me ideologji të ndryshme ekstremiste. Sipas autoriteteve, ekziston edhe një rrezik në rritje nga aktorë të lidhur me shtete të huaja.
Një 45-vjeçar është arrestuar si i dyshuar për tentativë vrasjeje dhe ndodhet në paraburgim. Ai rezulton të ketë qenë i referuar më herët në programin kundër ekstremizmit “Prevent”.
Ngjarja është pjesë e një serie incidentesh të fundit që kanë shënjestruar komunitetin hebre në Mbretërinë e Bashkuar, përfshirë sulme me automjete, zjarrvënie dhe akte dhune pranë sinagogave.
Kryeministri britanik dhe kryebashkiaku i Londrës kanë paralajmëruar shtim të masave të sigurisë, përfshirë praninë më të madhe të policisë, edhe me forca të armatosura në terren.
Ndërkohë, qeveria ka njoftuar një fond shtesë prej 25 milionë paundësh për forcimin e sigurisë në komunitetet hebreje dhe institucionet fetare.
