Papa Leoni XIV ka deklaruar këtë të dielë se krijimi i një shteti palestinez është e vetmja zgjidhje reale dhe e drejtë për konfliktin e gjatë mes Izraelit dhe Palestinës. Mesazhi i tij, i dhënë gjatë fluturimit nga Turqia drejt Libanit, vjen në një moment kur tensionet në Lindjen e Mesme janë të larta dhe debati ndërkombëtar për paqen në rajon është rikthyer me forcë.
“Ne të gjithë e dimë se në këtë moment Izraeli ende nuk e pranon këtë zgjidhje, por ne besojmë se është e vetmja zgjidhje”, u tha Papa gazetarëve, duke riafirmuar qartë pozicionin tradicional të Vatikanit. Ai nënvizoi se Selia e Shenjtë ka marrëdhënie miqësore me Izraelin, por kërkon të jetë një zë ndërmjetësimi që mund t’i afrojë palët drejt një marrëveshjeje të drejtë dhe të qëndrueshme.
Deklarata e Papës vjen pak ditë pasi kryeministri izraelit Benjamin Netanyahu deklaroi se kundërshton fuqishëm krijimin e një shteti palestinez, edhe pas sinjaleve të mbështetjes nga aleati i tij kryesor, Shtetet e Bashkuara. Kjo përplasje e pikëpamjeve shton kompleksitetin e çështjes, duke e bërë apelimin e Vatikanit edhe më të rëndësishëm.
Gjatë vizitës së tij në Turqi, Papa Leone XIV diskutoi me presidentin turk Rexhep Tajip Erdogan jo vetëm konfliktin izraelito-palestinez, por edhe luftën Ukrainë–Rusi, duke theksuar se Turqia ka potencialin të luajë një rol kyç në negociatat e paqes për të dy konfliktet. Papa paralajmëroi se e ardhmja e njerëzimit është në rrezik, duke përmendur numrin e pazakontë të konflikteve të përgjakshme në botë dhe duke dënuar dhunën në emër të fesë.
Kjo deklaratë e fortë e Vatikanit futet në një linjë të qartë mesazhesh që kanë synuar gjithmonë dialogun, drejtësinë dhe zgjidhjet diplomatike. Në një moment kur Lindja e Mesme po hyn në një kapitull të ri të paqëndrueshmërisë, fjalët e Papës shtojnë presionin moral mbi palët dhe komunitetin ndërkombëtar.
