Në Gjadër, ku një ish-mjedis i Forcave Ajrore Shqiptare i braktisur prej shumë vitesh është rindërtuar plotësisht, qendra e pritjes e ngritur nga Italia është gati dhe funksionale për të pritur emigrantë, të paktën 400 persona në fazën e parë shkruan TGCOM24.
Pas marrëveshjes së nënshkruar mes dy kryeministrave, Giorgia Meloni dhe Edi Rama, janë dy zona që janë të destinuara për të mirëpritur emigrantët – meshkuj, të ardhur nga vende të sigurta – të cilët synojnë të riatdhesohen shpejt pas shqyrtimit të aplikimit. të azilit.
Në portin e Shëngjinit është ngritur një hotspot për identifikimin e emigrantëve të shpëtuar në det ekskluzivisht nga anijet italiane. Pas mbledhjes së të dhënave personale, personat do të transferohen në Gjadër, rreth njëzet kilometra në brendësi të vendit.
Këtu janë ngritur tre struktura: një qendër për ndalimin e azilkërkuesve (880 vende), një CPR (144 vende) dhe një burg (20 vende). Struktura mbyllet me një gardh 5 metra të lartë me godinat e parafabrikuara në qendër ku do të vendosen emigrantët, ndërsa në një bllok të dytë do të akomodohen ata që u refuzohen aplikimet, të destinuar për t’u riatdhesuar.
Ata që do të kapen duke kryer krime, megjithatë, do të përfundojnë në një burg të vogël, ende brenda kampit. E gjithë qendra shtrihet në një sipërfaqe prej përafërsisht 70 mijë metra katrorë, me perimetrin që shtrihet për pak më shumë se dy kilometra midis një kreshtë mali dhe një lumi, të rrethuar me mure betoni dhe rrjetë metalike.
Në hyrje është pika e parë e kontrollit dhe jo shumë larg janë katër godina dykatëshe, të ndërtuara mbi module parafabrikate, ku do të strehohen personeli italian, përfshirë forcat e rendit dhe anëtarët e organit drejtues të qendrës.
Një rrugë e asfaltuar më pas të çon në zonën që do të mirëpresë emigrantët, e izoluar nga një gardh tjetër.
Struktura me dysheme betoni është e shpërndarë në dhoma të vogla me 4 persona me krevate marinari, garderobë dhe një tavolinë të vogël me karrige.
Ka ajër të kondicionuar në të gjitha dhomat, ndërsa një kasolle aty pranë strehon dushet dhe tualetet. Më pas është mensa dhe një hapësirë e dedikuar besimtarëve për t’u falur, si dhe një dhomë TV dhe infermieri.
Në të dy anët e hyrjes janë ngritur zyra të ndryshme për praktikat administrative dhe të gjitha procedurat e nevojshme për azilkërkuesit: nga sallat e gjyqit për seancat deri te dhomat e disponueshme për avokatët dhe lidhjet me video për verifikime.
Objekti do të presë gjithashtu staf nga ministritë e ndryshme të përfshira në procedura. Në një tjetër zonë të kampit, po ashtu i rrethuar, është ngritur qendra e riatdhesimit, ku do të mirëpriten emigrantët të cilëve u është refuzuar aplikimi dhe që do të duhet të largohen nga Shqipëria.
Për momentin do të jetë në gjendje të ofrojë strehim për disa dhjetëra persona. Këtu masat e sigurisë janë më të rrepta: Dritaret janë të mbyllura dhe të gjitha dyert e dhomës së gjumit hapen në një oborr të brendshëm të vogël të mbyllur.
Për ata që kapen duke kryer krime, ka një burg në kamp, me personelin e burgut që tashmë ka mbërritur në vend: qelitë e pajisura me TV, frigorifer dhe banjo dhe sallat e gjyqit për procedurat gjyqësore të magjistratëve italianë nëpërmjet videokonferencës./TGCOM24
