Kryeministri i Kosovës, Albin Kurti, ka deklaruar se ende nuk ka asnjë rezultat konkret për zgjedhjen e presidentit të ri, ndërsa afati po afrohet.
Edhe pse kanë mbetur vetëm 12 ditë nga afati kushtetues, Kurti tha se komunikimet me partitë opozitare po vazhdojnë, por pa ndonjë zhvillim të ri. Ai theksoi se sapo të ketë progres, do të informohet publiku.
Nga ana tjetër, Glauk Konjufca, njëherësh kandidat për president nga Lëvizja Vetëvendosje, u bëri thirrje partive opozitare që të propozojnë një emër të përbashkët, duke lënë të hapur mundësinë për një kandidat konsensual.
Takimi mes Kurtit dhe kreut të LDK-së, Lumir Abdixhiku, përfundoi pa marrëveshje, ndërsa ky i fundit paralajmëroi vijimin e konsultimeve me partitë e tjera. Ndërkohë, kreu i AAK-së, Ramush Haradinaj, ka refuzuar pjesëmarrjen në takime, ndërsa PDK ka kërkuar qëndrime të qarta me shkrim nga qeveria.
Procesi mbetet në ngërç edhe pas përfundimit të mandatit të presidentes Vjosa Osmani më 4 prill 2026. Kandidaturat e propozuara më herët nga Vetëvendosje, përfshirë Konjufcën dhe Fatmire Mulhaxha-Kollçakun, nuk arritën të votohen për shkak të mungesës së kuorumit.
