Turqia i ka kërkuar Rusisë dhe Ukrainës të vendosin një moratorium për sulmet në Detin e Zi, ndërsa tensionet në rajon po rriten pas goditjeve të përsëritura ndaj anijeve dhe porteve.
Ministri i Jashtëm turk Hakan Fidan tha se Ankaraja ua ka përcjellë të dyja palëve shqetësimin për sulmet ndaj anijeve dhe po merr masa sigurie. Sipas raportimeve, Turqia ka vendosur gjithashtu kufizime për disa anije tregtare që kërkojnë të hyjnë në Detin e Zi përmes Dardaneleve, përfshirë mjete lundruese me destinacion Rusinë dhe Ukrainën.
Ndërkohë, Volodymyr Zelensky deklaroi se Vladimir Putin po shqyrton mundësinë e një mobilizimi masiv në Rusi, por duke u përpjekur ta realizojë atë pa një shpallje zyrtare. Sipas presidentit ukrainas, Moska mund të përdorë kontrata të posaçme, kufizime në kufij dhe masa të tjera për të shtuar numrin e forcave të saj.
Zelensky tha gjithashtu se Rusia ka ngritur tre unaza të mbrojtjes ajrore rreth Moskës, duke zhvendosur sisteme nga pjesë të tjera të territorit rus. Ai paralajmëroi se Ukraina do të vazhdojë të zhvillojë teknologji për të depërtuar mbrojtjen ruse.
Luftimet vijuan edhe gjatë së shtunës. Autoritetet ukrainase thanë se sulmet ruse në rajonin e Dnipropetrovsk lanë të paktën dy të vrarë dhe dy të plagosur. Rusia, nga ana tjetër, njoftoi se kishte goditur depo armësh dhe municionesh në portet e Odesës dhe Mykolaivit, si dhe dy anije që, sipas Moskës, përdoreshin për transportin e armëve.
Një tjetër incident që ngriti alarmin ndodhi në Bullgari, ku një dron shpërtheu rreth një kilometër larg një stacioni kompresimi të gazsjellësit Transballkanik. Ministria bullgare e Mbrojtjes tha se bëhej fjalë për një tip droni të përdorur gjerësisht nga ushtria ukrainase, por theksoi se nuk kishte prova për një veprim të qëllimshëm. Sofia ka thirrur për sqarime ambasadoren ukrainase, ndërsa Kievi mohoi se kishte shënjestruar territorin bullgar.
Tensionet janë shtuar edhe në Gjermani. Dronë janë parë mbi një strukturë ushtarake në Mechernich, ku ruhen pajisje ushtarake dhe komponentë të sistemit amerikan Patriot. Incidenti vjen vetëm pak ditë pas gjetjes së një droni me eksploziv në aeroportin e Leipzigut, ku autoritetet gjermane kanë vendosur një sistem të lëvizshëm kundër dronëve.
Në këtë situatë, Zelensky po kërkon më shumë sisteme të mbrojtjes ajrore. Pas takimit në Beograd me presidentin serb Aleksandar Vuçiç, ai tha se Ukraina merr çdo muaj raketa Patriot nga Shtetet e Bashkuara, por sasia mbetet e pamjaftueshme. Kievi po zhvillon bisedime edhe me Izraelin për blerjen e sistemeve të tjera të mbrojtjes ajrore.
