Një valë kërcënimesh me bombë ka përfshirë disa televizione të mëdha europiane, duke shkaktuar evakuimin e gazetarëve, ndërprerjen e programeve dhe ndërhyrjen e forcave të sigurisë. Mesazhet kërcënuese paralajmëronin shpërthime brenda 45 minutash, ndërsa autorët pretendonin se kjo ishte vetëm fillimi i një fushate më të gjerë kundër Europës.
Sipas agjencisë Reuters, kërcënimet e së premtes, 6 nëntor, prekën transmetuesin publik irlandez RTE, televizionin britanik Sky dhe televizionin privat bullgar Nova TV, si edhe media të tjera.
Pavarësisht alarmit, kontrollet policore nuk zbuluan lëndë shpërthyese në asnjërin prej objekteve të prekura.
### “Kjo është vetëm fillimi. Europa duhet të përgatitet!”
Në mesazhin elektronik të marrë nga televizionet RTE dhe Nova, autorët pretendonin se kishin vendosur një pajisje shpërthyese brenda ndërtesave.
“Duam që e gjithë bota të mësojë për ne. Prandaj një nga operativët tanë ka vendosur një pajisje shpërthyese në ndërtesën tuaj. Ajo do të shpërthejë pas 45 minutash. Ora po troket”, thuhej në mesazh.
Email-et mbanin titullin “Mesazh për Perëndimin” dhe ishin nënshkruar me emrin Mikhail Andropov.
Personi që pretendonte se ishte një nga drejtuesit e grupit përgjegjës për kërcënimet ndaj avionëve gjatë kësaj jave paralajmëronte se veprimet e deritanishme ishin vetëm një pjesë e asaj që mund të pasonte.
“Por ky është vetëm fillimi. Ajo që ndodhi këtë javë është vetëm një pjesë e vogël e asaj që e pret Europën në të ardhmen e afërt”, shkruhej në mesazh.
### Televizioni irlandez ndërpret programet për tri orë
Në Irlandë, stafi i transmetuesit publik RTE u evakuua, ndërsa policia kreu kontrolle për më shumë se tri orë.
Gjatë kësaj kohe, një pjesë e programeve u zëvendësuan me muzikë dhe mesazhe të regjistruara.
Punonjësit u rikthyen në ambientet e televizionit vetëm pasi autoritetet përfunduan kontrollet dhe konfirmuan se nuk kishte rrezik.
Në Bullgari, policia ndërhyri në redaksinë e Nova TV në Sofje. Gazetarët dhe punonjësit u evakuuan përkohësisht, por transmetimi nuk u ndërpre.
### A fshihet Rusia pas kërcënimeve?
Një element që ka tërhequr vëmendjen e hetuesve është emri i përdorur në mesazhet kërcënuese: Mikhail Andropov.
Mbiemri përkon me atë të Yuri Andropovit, ish-sekretar i përgjithshëm i Partisë Komuniste të Bashkimit Sovjetik.
Edhe titulli i mesazhit, “Mesazh për Perëndimin”, kujton titullin e një biografie të ish-udhëheqësit sovjetik, “Sfida e re ndaj Perëndimit”.
Megjithatë, sipas Reuters, nuk ka prova që këto elemente të tregojnë përfshirjen e Rusisë. Autoritetet nuk kanë përcaktuar nëse bëhet fjalë për një lidhje reale apo një përpjekje për t’i orientuar dyshimet drejt Moskës.
### Nga avionët te televizionet, një valë kërcënimesh në Europë
Kërcënimet ndaj mediave vijnë pas një serie alarmesh të rreme për bomba në avionë që kanë shkaktuar probleme në transportin ajror europian gjatë ditëve të fundit.
Fluturime nga Serbia drejt Finlandës, Spanjës dhe destinacioneve të tjera janë përballur me devijime, ulje emergjente dhe kontrolle sigurie.
As në këto raste nuk janë zbuluar eksplozivë.
Situata vjen gjithashtu në një periudhë shqetësimesh për sulmet kibernetike në Europë, përfshirë incidente të raportuara në sektorin e supermarketeve.
### Kryeministri irlandez: Synojnë të përhapin frikë dhe pasiguri
Kryeministri i Irlandës, Micheál Martin, deklaroi se agjencitë europiane të sigurisë nuk kanë përcaktuar ende nëse kërcënimet janë veprime individuale apo pjesë e një operacioni të koordinuar.
Sipas tij, ngjarjet tregojnë se sa lehtë mund të pengohet funksionimi normal i shoqërisë përmes veprimeve jokonvencionale që synojnë të krijojnë frikë dhe ankth.
“Duhet të ruajmë qetësinë”, bëri thirrje kryeministri irlandez.
Autoritetet europiane vijojnë hetimet për identifikimin e autorëve dhe për të përcaktuar nëse ekziston një lidhje mes kërcënimeve ndaj televizioneve dhe atyre që kanë goditur transportin ajror.
