Një postim i pazakontë nga Donald Trump ka shkaktuar reagime të forta në Shtetet e Bashkuara, pasi ai publikoi një imazh të krijuar me inteligjencë artificiale ku paraqitej si figurë biblike, i ngjashëm me Jezu Krishtin.
Fotoja, e shpërndarë në platformën Truth Social, e shfaqte Trump me rroba të bardha dhe me një dritë të fortë rreth tij, duke vendosur dorën mbi kokën e një personi, në një skenë që ngjasonte me ikonografinë tradicionale të Krishtit shërues.
Reagimet nuk vonuan. Liderë fetarë dhe figura publike e cilësuan postimin si blasfemik dhe të papërshtatshëm, duke rritur tensionet mes Trump dhe Papa Leo XIV.
Përplasja me Vatikanin
Postimi erdhi në kulmin e një përplasjeje të fortë mes Trump dhe Papës, i cili ka kritikuar ashpër luftën e nisur nga SHBA dhe Izraeli kundër Iranit, duke e cilësuar atë çnjerëzore.
Papa Leo XIV është përgjigjur se nuk ka frikë nga administrata amerikane dhe do të vazhdojë të flasë kundër shkeljeve të ligjit ndërkombëtar.
Ndërkohë, Trump e quajti Papën “të dobët” në politikat e jashtme dhe kriminalitetin, duke thelluar më tej përçarjen.
Reagime edhe nga mbështetësit
Edhe brenda kampit konservator, reagimet kanë qenë të ashpra. Disa figura të njohura republikane e cilësuan postimin si të tepruar dhe të papranueshëm.
Ekspertët e artit theksuan se imazhi përdorte elementë klasikë të ikonografisë së Krishtit, si drita hyjnore dhe gjesti i shërimit, duke e bërë të vështirë pretendimin e Trump se fotoja e paraqiste atë thjesht si “mjek”.
Pas kritikave në rritje, Trump e fshiu postimin dhe deklaroi se nuk kishte ndërmend të paraqitej si figurë fetare.
Rrezik për bazën elektorale
Ngjarja mund të ndikojë në marrëdhëniet e Trump me votuesit fetarë, veçanërisht katolikët, të cilët përbëjnë një pjesë të rëndësishme të bazës së tij elektorale.
Analistët e cilësojnë këtë moment si një provë për besnikërinë e votuesve: nëse do të qëndrojnë me presidentin apo do të distancohen për shkak të përplasjes me Vatikanin.
