Aktori amerikan RJ Mitte, i njohur në mbarë botën për rolin e Walter White Jr. në serialin e famshëm “Breaking Bad”, ka ndërruar jetë në moshën 34-vjeçare.
Lajmi është konfirmuar për BBC nga përfaqësuesi i aktorit, Sean Reilly, i cili njoftoi se Mitte ka humbur jetën në Brownsville të Teksasit. Shkaku i vdekjes nuk është bërë ende i ditur.
“Me trishtim të thellë njoftojmë ndarjen tragjike nga jeta të aktorit të dashur, filantropit dhe mbrojtësit të pasionuar të të drejtave të personave me aftësi të kufizuara, RJ Mitte”, thuhet në deklaratën e përfaqësuesit të tij.
Mitte u bë i famshëm falë rolit të djalit të Walter White, personazhit kryesor të interpretuar nga Bryan Cranston në serialin “Breaking Bad”. Ai luajti përkrah emrave të njohur të kinematografisë, përfshirë Aaron Paul, në një prej prodhimeve televizive më të vlerësuara të shekullit XXI.
Aktori jetonte me paralizë cerebrale, një gjendje neurologjike që ndikon në lëvizje dhe koordinim. Përvoja e tij personale e ndihmoi të sillte autenticitet në interpretimin e Walter White Jr., një personazh që gjithashtu jetonte me këtë gjendje.
Për interpretimin në “Breaking Bad”, Mitte ishte pjesë e kastit që fitoi çmimin e Shoqatës së Aktorëve Amerikanë, SAG, në vitin 2014.
Seriali, i transmetuar nga viti 2008 deri në vitin 2013, fitoi 16 çmime Emmy dhe u shndërrua në një fenomen botëror, duke rrëfyer historinë e një mësuesi kimie që përfshihet në botën e prodhimit dhe trafikimit të drogës.
Përtej aktrimit, RJ Mitte ishte një aktivist i njohur për të drejtat e personave me aftësi të kufizuara. Ai shërbeu si ambasador i organizatave United Cerebral Palsy dhe Shriners Children’s, ndërsa themeloi edhe fondacionin që mbante emrin e tij për të mbështetur nisma bamirësie dhe përfshirjen sociale.
Gjatë karrierës së tij, aktori kërkoi vazhdimisht që industria e filmit dhe televizionit të krijonte më shumë mundësi për artistët me aftësi të kufizuara dhe të shmangte stereotipet në paraqitjen e tyre në ekran.
Përveç “Breaking Bad”, ai u shfaq në prodhime si “Hannah Montana”, “Switched at Birth” dhe “Westhampton”. Projekti i tij më i fundit ishte “Talking to Strangers”, i publikuar gjatë vitit 2026.
Vdekja e tij në moshë kaq të re i jep fund karrierës së një aktori që la gjurmë jo vetëm në televizion, por edhe në përpjekjet për një industri më gjithëpërfshirëse.
