Një ngjarje e rëndë është regjistruar mbrëmjen e së dielës në fshatin Kërvasari të Malishevës, ku një çift bashkëshortor është gjetur i plagosur me armë zjarri brenda dhomës së gjumit.

Gruaja, e cila ishte në javën e 34-t të shtatzënisë, është transportuar me urgjencë në Qendrën Klinike Universitare të Kosovës. Pavarësisht masave reanimatore të ndërmarra nga ekipi mjekësor, ajo nuk ka mundur t’u mbijetojë plagëve dhe ka ndërruar jetë.

Bashkëshorti i saj ndodhet në gjendje shumë të rëndë dhe të paqëndrueshme. Drejtori i Emergjencës në QKUK, Naser Syla, bëri të ditur se ai është intubuar dhe është vendosur në respirator.

“Burri është i intubuar dhe i kyçur në respirator. Janë kryer ekzaminimet e nevojshme. Gjendja është shumë e rëndë dhe jo stabile”, deklaroi Syla.

Sipas Policisë së Kosovës, ngjarja është raportuar rreth orës 23:20. Në vendngjarje është sekuestruar një armë zjarri, e cila pritet t’u nënshtrohet ekzaminimeve përkatëse.

Rasti është cilësuar fillimisht si “vrasje e rëndë”, ndërsa hetuesit po punojnë për të përcaktuar dinamikën dhe motivin e ngjarjes. Deri tani nuk është sqaruar se në çfarë rrethanash janë qëlluar dy bashkëshortët.