Një valë e re sulmesh me dronë dhe raketa nga Rusia ka goditur Ukrainën gjatë natës, duke shkaktuar të paktën 15 viktima dhe rreth 100 të plagosur, sipas autoriteteve ukrainase.
Në kryeqytetin Kyiv, katër persona humbën jetën, mes tyre edhe një djalë 12-vjeçar. Kryebashkiaku Vitali Klitschko bëri të ditur se një ndërtesë 16-katëshe u shemb pas goditjes, ndërsa ekipet e shpëtimit nxorën nga rrënojat një nënë dhe fëmijën e saj.
Në qytetin juglindor Dnipro, tre persona u vranë dhe dhjetëra të tjerë u plagosën, ndërsa pamjet tregojnë ndërtesa të përfshira nga flakët.
Ndërkohë, në portin jugor të Odesa, sulmet shkaktuan tetë viktima, ndërsa bombardimet vijuan edhe në orët e mëngjesit. Sulme u raportuan edhe në Kharkiv, ku dy persona të moshuar mbetën të plagosur.
Autoritetet lokale njoftuan gjithashtu se qytetet Mykolaiv dhe Kherson kanë mbetur pa energji elektrike pas sulmeve.
Presidenti Volodymyr Zelensky deklaroi se forcat ajrore ukrainase kanë rrëzuar 636 dronë gjatë 24 orëve të fundit, ndërsa Rusia ka lëshuar afro 700 dronë dhe 19 raketa balistike e lundruese.
Zelensky theksoi se sulmet tregojnë se Rusia nuk meriton lehtësim të sanksioneve, duke kërkuar presion më të madh ndërkombëtar për t’i dhënë fund luftës.
Nga ana tjetër, ministri i Jashtëm ukrainas Andrii Sybiha i cilësoi sulmet si krime lufte dhe bëri thirrje për masa të menjëhershme nga komuniteti ndërkombëtar.
Lufta në Ukrainë hyn tashmë në vitin e pestë, ndërsa përpjekjet për armëpushim mbeten të bllokuara mes akuzave të ndërsjella dhe mungesës së një marrëveshjeje përfundimtare.
