Ish-presidenti Ilir Meta kundërshtoi akuzat e ngritura ndaj tij gjatë procesit gjyqësor që po zhvillohet ndaj tij dhe Monika Kryemadhit, duke pretenduar se hetimi është i motivuar politikisht dhe se prokuroria ka manipuluar faktet e çështjes.
Gjatë seancës, Meta kërkoi thirrjen e disa dëshmitarëve, mes tyre edhe kryeministrit Edi Rama, duke argumentuar se dëshmitë e tyre janë të nevojshme për zbardhjen e plotë të ngjarjes.
Ish-presidenti pretendoi se arrestimi i tij më 21 tetor 2024 është bazuar në një letërporosi të falsifikuar që lidhej me marrëveshjen me kompaninë amerikane DSIS. Ai përmendi edhe ish-zyrtarin e FBI-së, Charles McGonigal, duke pretenduar se ky i fundit ka pasur rol në nisjen e hetimeve, si dhe iu referua kallëzimit të Romeo Karajt dhe takimeve të pretenduara në Vjenë.
Meta kundërshtoi gjithashtu provat që lidhen me sekuestrimin dhe ekspertimin e një telefoni të gjetur gjatë kontrollit të banesës, duke deklaruar se pajisja nuk i përkiste Fatime Kryemadhit dhe se kjo ishte sqaruar që në momentin e kontrollit.
“Këto janë veprime të qëllimshme kundër Ilir Metës”, u shpreh ish-presidenti, duke mohuar se ka kërkuar favore apo ka pasur interesa në çështjet që po hetohen.
Në përfundim të seancës, gjykata vendosi ta shtyjë procesin për më 10 shtator, në orën 11:00.
