Një sulm me armë zjarri në një shkollë fillore në Oregon të Shteteve të Bashkuara ka shkaktuar vdekjen e katër personave, mes tyre tre fëmijë të moshave 5, 8 dhe 11 vjeç, si dhe një mësues. Autori i dyshuar, një adoleshent 16-vjeçar, është qëlluar për vdekje nga një qytetar që ndërhyri për të ndalur sulmin.
Ngjarja tragjike ndodhi të enjten, më 15 tetor, në shkollën fillore “Silver Rail Elementary School”, në qytetin Bend të Oregonit.
Sipas BBC, shefi i Policisë së Bend, Mike Krantz, deklaroi se autori i dyshuar u qëllua për vdekje nga një qytetar, i cili e kishte ndjekur brenda ambienteve të shkollës.
Guvernatorja e Oregonit, Tina Kotek, vlerësoi ndërhyrjen e qytetarit, duke e cilësuar atë një veprim heroik që ndihmoi në ndalimin e sulmit.
Përveç katër viktimave, autoritetet kanë raportuar edhe dy persona në gjendje kritike.
Një dëshmitar, Irvin Ornelas, tregoi për CBS News se kishte parë autorin e dyshuar pranë shkollës pak përpara të shtënave.
“E pashë duke hedhur armën përtej gardhit dhe duke kapërcyer shumë shpejt”, deklaroi ai.
Ornelas tha se vëllai i tij 10-vjeçar ndodhej në shkollë në momentin e ngjarjes, por kishte shpëtuar pa lëndime.
Pas tragjedisë, autoritetet vendosën mbylljen e shkollave të distriktit gjatë së premtes. Ndërkohë, qytetarët kanë vendosur lule dhe lodra fëmijësh pranë shkollës në kujtim të viktimave.
Ngjarja ka shkaktuar reagime në të gjithë Shtetet e Bashkuara.
Sekretarja amerikane e Arsimit, Linda McMahon, u shpreh e tronditur nga sulmi dhe falënderoi ekipet e emergjencës, si dhe qytetarin që ndërhyri për të parandaluar një tragjedi edhe më të rëndë.
Organizatat që kërkojnë kontroll më të fortë të armëve kanë bërë thirrje për masa të menjëhershme.
Organizata “March For Our Lives” deklaroi se pikëllimi nuk mund të jetë përgjigjja e vetme ndaj ngjarjeve të tilla, ndërsa “Everytown for Gun Safety” kritikoi mungesën e veprimeve për të parandaluar dhunën me armë në shkolla.
Sipas të dhënave të publikuara nga BBC Verify, gjatë vitit 2026 janë regjistruar deri tani 149 incidente me armë në shkollat amerikane.
Baza e të dhënave K-12 School Shootings tregon se numri i incidenteve të tilla ka shënuar rritje gjatë 15 viteve të fundit, duke arritur kulmin në vitin 2023 me 352 raste.
Ndërkohë, sipas organizatës Everytown for Gun Safety, deri më 15 tetor të këtij viti, incidentet me armë në shkolla kishin shkaktuar 33 viktima dhe 63 të plagosur.
