Duket i vogël dhe i padëmshëm brenda akuariumit, por peshku i kuq mund të shndërrohet në problem serioz për natyrën kur lirohet në lumenj, liqene apo kanale.
Carassius auratus, një nga peshqit më të zakonshëm që mbahen si kafshë shtëpiake, mund të përshtatet me mjedise të ndryshme dhe, pasi përfundon në ujërat natyrore, të krijojë popullata jashtë kontrollit.
Për këtë arsye, ekspertët paralajmërojnë që peshqit e kuq të akuariumit të mos hidhen apo lirohen në natyrë. Jashtë akuariumit ata mund të rriten shumë më tepër sesa jemi mësuar t’i shohim dhe të konkurrojnë me speciet vendase për ushqim dhe hapësirë.
Prania e tyre në numër të madh mund të ndikojë gjithashtu në ekosistemin ujor, pasi kërkojnë ushqim në fund të ujit, trazojnë sedimentet dhe mund të përkeqësojnë cilësinë e ujit.
Problemi është bërë aq serioz në disa vende sa peshku i kuq po përmendet mes specieve pushtuese që mund të shkaktojnë dëme në ekosistemet ku nuk është pjesë natyrore e faunës.
Prandaj, nëse nuk mund ta mbani më një peshk të kuq, zgjidhja nuk është ta “lironi” në natyrë. Dorëzimi te një person tjetër, një dyqan i specializuar apo një strukturë që mund të kujdeset për të është alternativë shumë më e sigurt.
