Christa Pike, e dënuar me vdekje në Tennessee, është e vetëdijshme dhe komunikon, gati një javë pasi mbijetoi një tentativë të dështuar ekzekutimi me injeksion vdekjeprurës.
Avokatët e 50-vjeçares njoftuan të martën se Pike është “e vetëdijshme dhe flet”, por vazhdon të marrë trajtim mjekësor intensiv në spital. Gjendja e saj mbetet serioze dhe ende nuk dihet se çfarë pasojash afatgjata mund të ketë.
Ekzekutimi ishte planifikuar më 30 shtator në Tennessee. Autoritetet i administruan dy doza pentobarbitali, medikamenti që përdoret në injeksionin vdekjeprurës, por procedura nuk solli vdekjen e saj.
Pike vazhdoi të merrte frymë dhe, pas dështimit të ekzekutimit, u transportua me urgjencë në një spital në Nashville, ku për disa ditë qëndroi në gjendje kritike dhe me ventilim mekanik.
Avokatët e saj kanë bërë të ditur se rikuperimi pritet të jetë i gjatë, ndërsa kanë ngritur pikëpyetje serioze mbi procedurën e ndjekur gjatë ekzekutimit.
Christa Pike u dënua me vdekje për vrasjen e Colleen Slemmer në vitin 1995. Ajo kishte qenë vetëm 18 vjeçe në kohën e krimit.
Pas dështimit të ekzekutimit, guvernatori i Tennessee, Bill Lee, pezulloi ekzekutimet e tjera të planifikuara për pjesën e mbetur të vitit 2026 dhe urdhëroi një hetim të pavarur për të përcaktuar se çfarë shkoi keq.
Rasti ka rihapur debatin në SHBA mbi injeksionin vdekjeprurës dhe procedurat e ekzekutimit, ndërsa mbetet ende e paqartë nëse shteti do të tentojë përsëri ekzekutimin e Pike nëse ajo rikuperohet.
Lexo më shumë:
