Kreu i Partisë Demokratike, Sali Berisha, vijoi akuzat pas përfundimit të seancës së tensionuar parlamentare, duke e lidhur çështjen e ish-drejtoreshës së SHISH, Vlora Hyseni, drejtpërdrejt me kryeministrin Edi Rama dhe biznesmenin Ergys Agasi.
Në një prononcim jashtë Kuvendit, Berisha pretendoi se Hyseni, gjatë drejtimit të Shërbimit Informativ Shtetëror, ka vepruar me dijeninë dhe sipas porosive të kryeministrit.
“Vlora Hyseni ka zbatuar në çdo veprimtari të saj porositë, urdhrat e Edi Ramës. Lidhjet e saj me Ergys Agasin i ka ditur e gjithë Kryeministria dhe SHISH. Nuk ka asnjë risi në ato lidhje”, deklaroi Berisha.
Kreu i PD-së pretendoi se përdorimi i të dhënave sekrete të SHISH në interes të grupeve kriminale përbën një goditje të rëndë për sigurinë kombëtare dhe për besueshmërinë e Shqipërisë te partnerët ndërkombëtarë. Ai ngriti gjithashtu pretendimin se përmes SHISH mund të ishin cenuar edhe sekretet që NATO i ka besuar Shqipërisë.
Berisha rezervoi akuzat më të forta për Ergys Agasin, të cilin e cilësoi “mafiozin më të rrezikshëm të Europës”. Sipas tij, Agasi kishte arritur të siguronte ndikim mbi SHISH, segmente të Policisë së Shtetit dhe të sistemit të drejtësisë. Këto janë pretendime të Berishës dhe në deklaratën e shpërndarë për mediat nuk paraqiten prova të reja për t’i mbështetur.
“Ky është i vetmi bos i krimit që kishte në kontroll të plotë, dhe unë e kisha denoncuar me kohë këtë, Shërbimin Informativ të Shtetit. Në kontroll të plotë Ministrinë e Rendit dhe Policinë e Shtetit. Në kontroll të plotë segmente të sistemit të drejtësisë”, deklaroi Berisha.
Ai përmendi më tej Vlora Hysenin, Ergys Agasin, Ermal Beqirin, Karçanajn dhe ish-drejtorin e Policisë së Shtetit, Ilir Proda, duke pretenduar se veprimet e tyre janë kryer “me urdhër dhe dijeni të plotë të Edi Ramës”.
Berisha ngriti akuza edhe për zgjedhjet, duke pretenduar se gjatë fushatës elektorale Agasi, përfaqësues të grupeve nga Elbasani dhe Durrësi dhe Vangjush Dako zhvillonin takime në lokalin e menaxhuar nga Embro Sulejmani, ku sipas tij hartohej “projekti i grabitjes së mandateve”. Edhe këto pretendime nuk shoqërohen me prova në deklaratën e PD-së.
Kreu demokrat e cilësoi qëndrimin e mazhorancës në seancën e sotme si mbrojtje politike të Hysenit dhe Agasit, ndërsa akuzoi Partinë Socialiste për lidhje me krimin e organizuar.
Deklaratat e Berishës vijnë në një kohë kur ish-drejtoresha e SHISH, Vlora Hyseni, është nën masën e sigurisë “arrest në shtëpi”. Pretendimet politike të ngritura nga kreu i PD-së ndaj personave të përmendur në deklaratë nuk përbëjnë në vetvete konstatime gjyqësore.
