Bypass-i i Tiranës, një nga projektet kryesore të infrastrukturës rrugore, po avancon me punimet në dy lotet e para, ndërsa qeveria synon të sigurojë financimin për pjesën e mbetur gjatë fillimit të vitit 2027.

Aksi me gjatësi totale 21 kilometra do të lidhë autostradën Tiranë–Durrës me autostradën Tiranë–Elbasan, duke u mundësuar drejtuesve të automjeteve të udhëtojnë nga Kashari drejt zonës së TEG-ut pa kaluar përmes Tiranës.

Gjatë inspektimit të kantierit, kryeministri Edi Rama u shoqërua nga ministri i Infrastrukturës dhe Energjisë, Enea Karakaçi, dhe drejtori i Autoritetit Rrugor Shqiptar, Ami Kozeli.

Përfundon mbi 50% e punimeve në 10 kilometrat e parë

Ministri Karakaçi bëri të ditur se punimet në dy lotet e para, të financuara dhe kontraktuara nga Autoriteti Rrugor Shqiptar, kanë kaluar nivelin 50%.

“Këtu jemi në 10 kilometrat e parë, të cilat janë të financuara dhe kontraktuara nga ARRSH. Punimet kanë ecur mirë, jemi në nivelin e rreth 50% të punimeve të kryera në dy lotet që janë kontraktuar”, deklaroi ministri.

Ndërkohë, 11 kilometrat e mbetur do të realizohen përmes financimit të Bankës Europiane për Rindërtim dhe Zhvillim (BERZH).

Sipas ministrit, për këtë segment është siguruar edhe një grant që mbulon 40% të financimit, me vlerë rreth 53 milionë euro, nga Korniza e Investimeve për Ballkanin Perëndimor.

Qeveria parashikon që marrëveshja e financimit me BERZH të miratohet brenda tremujorit të parë të vitit 2027, për t’i hapur rrugën nisjes së punimeve në pjesën e mbetur.

Kashar–Rrogozhinë, shpronësimet nisin në nëntor

Një tjetër zhvillim i rëndësishëm lidhet me segmentin Kashar–Rrogozhinë, pjesë e lidhjeve të Korridorit Blu.

Ministri Karakaçi njoftoi se shpronësimet e para për këtë koncesion parashikohen të kryhen gjatë nëntorit, ndërsa ndërtimi synohet të nisë përpara fundit të vitit 2026.

“Brenda muajit nëntor unë parashikoj shpronësimet e para të koncesionit Kashar-Rrogozhinë dhe brenda fundit të vitit fillojnë dhe punimet për këtë aks të rëndësishëm”, u shpreh ai.

Bypass-i i Tiranës do të shërbejë gjithashtu si nyje lidhëse ndërmjet segmenteve Thumanë–Kashar dhe Kashar–Lekaj të Korridorit Blu.

Rama: Do të rritet vlera e pronave, shpronësimet sipas ligjit

Kryeministri Edi Rama u ndal edhe te ndikimi që ndërtimi i rrugës pritet të ketë në zonat përreth.

Sipas tij, investimi do të sjellë rritje të vlerës së pronave, ndërsa shpronësimet do të realizohen me transparencë dhe në përputhje me legjislacionin.

“Ajo që të gjithë duhet ta mbajnë parasysh në këtë zonë, është rritja e ndjeshme e vlerës së pronës së tyre, ndërkohë që pa diskutim çdo shpronësim do të bëhet ashtu si duhet, me transparencë sipas ligjit”, deklaroi Rama.

Si do të ndryshojë qarkullimi drejt jugut?

Aktualisht, një pjesë e automjeteve që lëvizin nga veriu dhe perëndimi i vendit drejt jugut apo juglindjes detyrohen të përdorin akset që kalojnë nëpër kryeqytet ose pranë tij.

Me përfundimin e Bypass-it, ky fluks do të ketë një alternativë të drejtpërdrejtë, duke shmangur hyrjen në Tiranë.

Kryeministri tha se kjo do të çlirojë kryeqytetin nga një pjesë e ngarkesës së trafikut dhe do të lehtësojë njëkohësisht hyrjen dhe daljen e automjeteve nga qyteti.

Projekti synon të shkurtojë kohën e udhëtimit, të përmirësojë qarkullimin dhe të krijojë një lidhje më funksionale ndërmjet autostradave kryesore të vendit.

Megjithatë, përfundimi i plotë i Bypass-it do të varet edhe nga miratimi i financimit dhe realizimi i punimeve në segmentin e mbetur prej 11 kilometrash.