Antonio Banderas e cilëson infarktin që pësoi në vitin 2017 si ngjarjen që i ndryshoi rrënjësisht jetën. Në një intervistë për revistën People, aktori 66-vjeçar tha se përvoja e bëri të kuptonte se sa e rëndësishme është të mos humbasësh kohë me gjëra të parëndësishme.
Banderas pësoi infarkt në shtëpinë e tij në Angli, ku partnerja Nicole Kimpel i dha ndihmën e parë përpara se ai të transportohej në spital. Mjekët i vendosën tre stenta në arterie gjatë një ndërhyrjeje urgjente.
Pas kësaj ngjarjeje, aktori vendosi të linte duhanin dhe të rikthehej në qytetin e tij të lindjes, Málaga, në Spanjë.
“Infarkti ishte gjëja më e mirë që më ka ndodhur në jetë. Ishte sikur dikush më vendosi syze dhe më bëri të shihja realitetin që nuk e shihja më parë”, u shpreh ai.
Sot, Banderas drejton teatrin e tij në Málaga dhe zotëron disa restorante në qytet. Ai luan gjithashtu në filmin biografik “Tony”, kushtuar jetës së hershme të shefit të kuzhinës Anthony Bourdain.
Aktori foli edhe për familjen e tij, duke vlerësuar ish-bashkëshorten Melanie Griffith si “një nënë të jashtëzakonshme” dhe duke u shprehur krenar për vajzën Stella dhe dy fëmijët e tjerë që ka rritur.
Sipas Banderas, përvoja e infarktit e bëri të kuptojë se pasuria më e madhe nuk janë gjërat materiale, por përjetimi i jetës.
