Tensione dhe përplasje janë regjistruar këtë të enjte përpara Kuvendit të Shqipërisë, ku protestuesit janë përballur me forcat e policisë gjatë kohës që brenda Parlamentit zhvillohej seanca plenare.
Forcat e policisë krijuan një kordon sigurie për të mos lejuar protestuesit të afroheshin pranë godinës së Kuvendit. Një pjesë e tubuesve tentuan të kalonin përtej perimetrit të vendosur nga efektivët, duke sjellë momente tensioni dhe shtyrje mes palëve.
Në një moment, disa protestues u ulën në rrugë, duke penguar qarkullimin. Policia ndërhyri për t’i larguar, ndërsa gjatë përplasjeve disa persona u shoqëruan nga efektivët.
Protesta zhvillohej paralelisht me debatet e forta brenda sallës së Kuvendit, ku opozita dhe mazhoranca u përplasën për çështjen e ish-drejtueses së SHISH, Vlora Hyseni. Edhe brenda Parlamentit pati tensione, me deputetë të opozitës që bllokuan foltoren dhe seancën që u ndërpre përkohësisht.
Pas përplasjeve, policia vijoi të mbante të rrethuar zonën pranë Kuvendit, ndërsa protestuesit qëndruan jashtë perimetrit të sigurisë.
