Përmbytja vdekjeprurëse në kufirin Nepal–Tibet mund të jetë shkaktuar nga shembja e një pjese gjigante akulli në Himalaje, tregojnë analizat paraprake të pamjeve satelitore.
Sipas ekspertëve, pjesa e poshtme e një akullnaje u shkëput në një lartësi prej rreth 5,200 metrash dhe ra afro 1,200 metra drejt luginës. Gjatë rënies, masa e akullit mori me vete shkëmbinj, baltë dhe sedimente, duke krijuar një ortek të fuqishëm akulli e gurësh.
Pamjet satelitore tregojnë se një zonë malore, më parë e gjelbër, u mbulua brenda pak kohësh nga një shtresë e madhe mbetjesh. Masa përfundoi në sistemin e lumenjve Lhende, Bhote Koshi dhe Trishuli, duke shkaktuar një valë shkatërruese uji, balte dhe gurësh.
Në disa pika, niveli i lumit raportohet se u rrit deri në nëntë metra brenda vetëm 30 minutash. Përmbytja shkatërroi banesa, ura dhe rrugë, ndërsa mori përpara banorë, turistë dhe pjesëtarë të ekipeve të emergjencës.
Shkencëtarët thonë se temperaturat e larta dhe shkrirja e dëborës mund ta kenë dobësuar akullnajën. Megjithatë, ata paralajmërojnë se është ende herët për të përcaktuar shkakun e saktë apo rolin konkret të ndryshimeve klimatike.
Të dhënat afatgjata tregojnë se Nepali ka humbur afro një të tretën e akullit të tij gjatë tri dekadave të fundit. Ritmi i shkrirjes së akullnajave në Himalaje është përshpejtuar ndjeshëm gjatë viteve të fundit.
Bilanci i katastrofës ka kaluar 150 viktima, ndërsa qindra persona, mes tyre shumë turistë të huaj, rezultojnë ende të zhdukur.
Burimi: The New York Times, Reuters, BBC News
