Ministri për Evropën dhe Punët e Jashtme, Ferit Hoxha, zhvilloi një takim me ministrin e Jashtëm të Serbisë, Marko Gjuriç, në margjinat e Ministerialit të zhvilluar në Uashington.
Sipas Hoxhës, gjatë bisedës u diskutua mbi zhvillimet aktuale dhe perspektivat e marrëdhënieve në rajon, ndërsa ai ripërsëriti qëndrimin e Shqipërisë lidhur me deklaratat e fundit të një anëtareje të Qeverisë së Serbisë për Kosovën.
Në një postim në rrjetin social X, ministri shqiptar theksoi se i kërkoi palës serbe të distancohet nga retorika që nxit tensione dhe cenon stabilitetin rajonal.
“Ripërsërita qëndrimin e qartë dhe të vendosur të Shqipërisë në lidhje me deklaratat e papranueshme dhe të papërgjegjshme të bëra së fundmi nga një anëtare e Qeverisë së Serbisë, si dhe theksova nevojën për të hedhur poshtë pa mëdyshje retorikën që nxit tensionet, minon stabilitetin dhe bashkëpunimin rajonal dhe bie ndesh me frymën e marrëdhënieve të fqinjësisë së mirë dhe vlerave evropiane”, shkroi Hoxha.
Ai shtoi se diplomacia kërkon dialog të hapur dhe përballje me dallimet në mënyrë të përgjegjshme.
