Një tjetër incident i rëndë është shënuar në Akademinë e Sigurisë, ku rreth 30 kursantë kanë përfunduar në spital pasi shfaqën simptoma të dyshuara helmimi ushqimor.
Sipas informacioneve paraprake, mbrëmjen e së mërkurës kursantët kanë shfaqur të vjella, diarre, temperaturë dhe dhimbje koke. Ata janë transportuar në grupe drejt spitalit, ku kanë marrë ndihmën e nevojshme mjekësore.
Ngjarja vjen vetëm rreth dy muaj pasi 56 studentë të Akademisë së Sigurisë u helmuan në një episod të ngjashëm, duke ngritur sërish pikëpyetje mbi sigurinë ushqimore në këtë institucion.
Pas rastit të fundit, Policia e Shtetit dhe Agjencia e Mbikëqyrjes Policore (AMP) kanë nisur hetimet për të zbardhur shkaqet e ngjarjes. Dyshimet e para lidhen me një helmim nga ushqimi.
Ndërkohë, Autoriteti Kombëtar i Ushqimit (AKU) pritet të marrë mostra të ushqimeve të konsumuara nga kursantët, për të përcaktuar shkakun e saktë të incidentit.
Autoritetet nuk kanë dhënë ende një reagim zyrtar mbi gjendjen shëndetësore të të gjithë kursantëve apo rezultatet paraprake të hetimeve.
