Kupa e Botës 2026 do të zhvillohet për herë të parë në historinë e futbollit në tre shtete njëkohësisht: SHBA, Kanada dhe Meksikë, nga 11 qershori deri më 19 korrik 2026, dhe përgatitjet kanë nisur edhe për tifozët shqiptarë që synojnë të ndjekin turneun nga afër.
Me rritjen e interesit – sidomos pas kualifikimit historik të Shqipërisë në fazën play-off të Botërorit pas fitores ndaj Andorrës dhe humbjes së Serbisë në Angli – Ambasada Amerikane në Tiranë ka bërë thirrje që qytetarët shqiptarë të aplikojnë sa më parë për vizë, për të shmangur vonesat dhe ngarkesën që pritet të rritet me afrimin e turneut.
Në një njoftim zyrtar, ambasada thekson:
“Shtetet e Bashkuara po mundësojnë udhëtime të sigurta dhe të mbrojtura për sportdashësit ndërkombëtarë që janë të interesuar të vijnë në SHBA për Kupën e Botës FIFA 26™, dhe jemi plotësisht të përgatitur për të përpunuar aplikimet për vizat e vizitorëve. I inkurajojmë udhëtarët e huaj që kanë nevojë për viza amerikane të aplikojnë tani.”
Turneu do të jetë më i madhi ndonjëherë, me 48 skuadra pjesëmarrëse, ndërsa stadiume gjigante në New York, Los Angeles, Dallas, Toronto, Vancouver e Meksiko City do të mirëpresin dhjetëra miliona tifozë nga e gjithë bota.
Për shqiptarët, shpresa për të parë kuqezinjtë në “Tokën e Premtuar” të futbollit është më e madhe se kurrë. Kombëtarja e Sylvinhos arriti për herë të parë në histori fazën play-off të Kupës së Botës, duke e vendosur Shqipërinë në një pozicion unik për të luftuar për një vend mes më të mëdhenjve të futbollit botëror.
Interesi për udhëtime drejt SHBA pritet të jetë i jashtëzakonshëm dhe ambasada thekson se aplikimi i hershëm është mënyra e vetme për të siguruar kohë dhe procedura të rregullta në prag të turneut.
