Një ngjarje e rëndë ka ndodhur pasditen e sotme në Sarandë, ku dy të rinj janë plagosur me armë zjarri në rrethana ende të paqarta. Ngjarja ka ndodhur rreth orës 15:00, në lagjen nr. 4 të qytetit bregdetar.
Sipas informacionit paraprak nga policia, të plagosur kanë mbetur shtetasit G. H., 32 vjeç dhe E. L., 24 vjeç. Të dy janë dërguar fillimisht në spitalin e Sarandës për ndihmë të parë, por për shkak të plagëve të marra, janë transportuar drejt Spitalit të Traumës në Tiranë për mjekim të specializuar.
Grupi hetimor, nën drejtimin e Prokurorisë së Sarandës, po vijon punën për identifikimin e autorit, sqarimin e plotë të rrethanave dhe dokumentimin ligjor të ngjarjes.
Policia është duke marrë dëshmitë dhe ka nisur hetimet për pistat e mundshme të krimit. Deri tani nuk ka asnjë person të ndaluar në lidhje me ngjarjen.
Ngjarja ka krijuar shqetësim në komunitetin lokal, ndërsa pritet më shumë informacion zyrtar nga autoritetet në orët në vijim.
