Kanë kaluar rreth gjashtë orë që kur një tërmet i fuqishëm goditi Myanmarin në Azinë Juglindore.
Ai u mat me magnitudë 7.7 në shkallën Rihter, rreth mesditës me kohën lokale (06:00 GMT) – që atëherë janë regjistruar edhe katër lëkundje të tjera më të vogla me magnitudë nga 4.5 deri në 6.6.
Myanmari, i njohur më parë si Burmë, drejtohet nga një regjim ushtarak dhe marrja e informacionit mund të jetë e vështirë. Ende nuk dihet numri i saktë i viktimave apo shkalla e plotë e dëmeve.
Por Shërbimi Birman i BBC-së ka folur me një punonjës shpëtimi në qytetin e dytë më të madh të vendit, Mandalay, i cili thotë se dëmet atje janë “të mëdha” dhe se numri i viktimave është “të paktën në qindra”. Kryqi i Kuq gjithashtu thotë se ka “dëme të konsiderueshme”.
Gjendje e jashtëzakonshme është shpallur në gjashtë rajone, dhe imazhet tregojnë ndërtesa dhe rrugë të dëmtuara rëndë – kemi siguruar edhe një video që tregon rrëzimin e një ure të madhe.
Ende nuk dihet me saktësi sa larg është përhapur dëmi – por kemi hartuar një pamje se deri ku është ndjerë tërmeti.
Në Tajlandë, e cila kufizohet me Myanmarin në lindje, tre punëtorë ndërtimi kanë humbur jetën dhe dhjetëra të tjerë janë plagosur pasi një ndërtesë shumëkatëshe e papërfunduar u shemb në kryeqytetin Bangkok. Ekipi ynë në qytet tha se ndjeu lëkundje të forta të ndërtesave.
Ka ende shumë gjëra që nuk i dimë, por ekipet tona në terren dhe në të gjithë BBC-në po punojnë me përkushtim për t’ju sjellë informacionet më të fundit.
