Gati 4 miliardë euro në nëntë muaj. Kaq para’ shpenzuan turistët e huaj që vizituan Shqipërinë deri në shtator. Të dhënat nga Banka e Shqipërisë tregojnë se në krahasim me janar-shtator e një viti më parë, shpenzimet e pushuesve të huaj janë zgjeruar me 641 milionë euro ose 20 për qind.
“Të gjithë jemi dëshmitarë të flukseve të turistëve të huaj që po hyjnë në Shqipëri”, tha Blerina Ago, eksperte e turizmit.
Nga janari në shtator, vendin e vizituan gjithsej rreth 9.6 milionë të huaj. Mesatarisht, çdo turist rezulton të ketë shpenzuar më pak se 400 euro, përfshirë këtu udhëtimin dhe akomodimin, duke përsëritur kështu paradoksin e “bumit të pushuesve të lirë”.
“Shqipëria nuk duhet të orientohet te shifrat. Raporti që ne duam është ai i shpenzimeve. Ne na duhen turistë që shpenzojnë. Ka shumë studime që tregojnë se ka kategori turistësh që shpenzojnë deri në 58 për qind të të ardhurave të tyre për pushime. Këta na duhen ne”, u shpreh ekspertja.
Fabulën joshëse “pushime me pak shpenzime në Shqipëri” e pranon edhe polaku Jan i cili ka ardhur për pushime në Tiranë.
“Ardhja në Shqipëri më shumë është kuriozitet. Gjetëm bileta të lira dhe menduam të vijmë. Gjithashtu edhe çmimet e shtëpive me qira janë të lira. Rreth 40 euro dita është mjaftueshëm. Edhe ushqimet nuk janë shumë të shtrenjta. Nuk shkojmë në restorante, pasi aty kushton shumë”, tha një turist polak.
Në linjë të ngjashme me shpenzimet e turistëve të huaj kanë shkuar edhe ato të pushuesve shqiptarë që preferuan t’i kalonin jashtë ditët e lejes nga puna. Të dhënat nga Banka Qendrore tregojnë se nga fillimi i vitit e deri në shtator, shqiptarët kanë shpenzuar mbi 2 miliardë euro për pushime jashtë vendit. Në raport me janar-shtatorin e një viti më parë, shifra është rritur me 326 milionë euro ose 19.1 për qind.
“Shqiptarët janë pushues të dëshiruar pasi janë nga ata që shpenzojnë. Nuk kursehen si disa turistë që vijnë në Shqipëri”, tha Rrahman Kasa, kreu i unionit turistik shqiptar.
Megjithatë, të dhënat nga Banka e Shqipërisë tregojnë se mesatarisht, një shqiptar që shkon jashtë për pushime shpenzon 349 euro. Kjo shifër është rreth 50 euro më pak nga sa ajo që turistët e huaj mesatarisht shpenzojnë kur vijnë në Shqipëri. /Telegrafi/
