Shtetet e Bashkuara kanë ndërmarrë sulme të reja ndaj Iranit pasi një helikopter ushtarak amerikan u rrëzua në zonën e Ngushticës së Hormuzit, duke rritur tensionet në Lindjen e Mesme dhe duke vënë në pikëpyetje përpjekjet për një marrëveshje paqeje mes Uashingtonit dhe Teheranit.
Presidenti amerikan Donald Trump deklaroi se helikopteri Apache u godit nga një dron iranian gjatë një patrullimi në zonë.
“Ata rrëzuan një helikopter dhe ne po përgjigjemi në këto momente. Besoj se përgjigjja duhet të jetë shumë e fortë, shumë e fuqishme dhe pikërisht kjo po ndodh”, tha Trump për ABC News.
Sipas zyrtarëve amerikanë, dy pilotët e helikopterit u shpëtuan nga një dron detar i Marinës amerikane pas rreth dy orësh në ujërat pranë brigjeve të Omanit. Ata ndodhen në gjendje të qëndrueshme shëndetësore.
Mediat shtetërore iraniane raportuan se ishulli Qeshm, në Ngushticën e Hormuzit, është goditur nga sulmet amerikane. Sipas agjencisë Fars, shpërthime janë dëgjuar edhe në disa zona të provincës Hormozgan.
Ministri i Jashtëm iranian Abbas Araqchi nuk e komentoi drejtpërdrejt incidentin me helikopterin, por deklaroi se prania e forcave të huaja në rajon rrit rrezikun e incidenteve dhe përplasjeve.
“Për të ulur rrezikun, zgjidhja më e mirë është që ata të largohen”, shkroi ai në rrjetet sociale.
Ndërkohë, televizioni shtetëror iranian citoi burime ushtarake që mohuan zhvillimin e operacioneve ajrore sulmuese iraniane në Ngushticën e Hormuzit gjatë 24 orëve të fundit, por paralajmëruan një përgjigje vendimtare ndaj çdo “veprimi armiqësor”.
Ngjarja vjen në një moment kur administrata Trump ka deklaruar vazhdimisht se është pranë një marrëveshjeje me Iranin për t’i dhënë fund konfliktit më të gjerë në Lindjen e Mesme dhe për të rihapur plotësisht trafikun detar në Ngushticën e Hormuzit, një nga rrugët më të rëndësishme energjetike në botë.
Në të njëjtën kohë, Izraeli vijoi operacionet ushtarake në Liban. Sipas Reuters, një sulm izraelit në qytetin bregdetar të Tirit vrau të paktën tetë persona, duke u bërë një nga goditjet më vdekjeprurëse në zonë që prej nisjes së konfliktit me Hezbollahun në muajin mars.
Përshkallëzimi i ri i situatës rrezikon të komplikojë më tej negociatat diplomatike dhe të ndikojë në tregjet ndërkombëtare të energjisë, ndërsa Ngushtica e Hormuzit mbetet ende pjesërisht e bllokuar.
