Qindra qytetarë kanë dalë në protestë në disa qytete të Ukrainës kundër vendimit të presidentit Volodymyr Zelensky për shkarkimin e ministrit të Mbrojtjes, Mykhailo Fedorov, një nga figurat më të vlerësuara të qeverisë ukrainase.
Në Kiev, protestuesit u mblodhën në qendër të qytetit me pankarta ku shkruhej “Mos e prekni Fedorovin”, “Ndaloni sabotimin e fitores” dhe brohoritën “Turp!”.
Zelensky nuk ka dhënë ende një shpjegim publik për largimin e 35-vjeçarit Fedorov, vendim që ka shkaktuar reagime të forta në ushtri, opinionin publik dhe shoqërinë civile.
Fedorov u emërua ministër i Mbrojtjes në janar dhe u vlerësua për luftën kundër korrupsionit, modernizimin e ministrisë dhe përdorimin e teknologjisë e analizës së të dhënave për përmirësimin e operacioneve ushtarake në front.
Parlamenti ukrainas pritet të votojë për emërimin e ministrit aktual të Brendshëm, Ihor Klymenko, si pasues të tij.
Sipas mediave ukrainase, largimi i Fedorovit mund të lidhet me mosmarrëveshjet e tij me komandantin e përgjithshëm të ushtrisë, Oleksandr Syrskyi, si edhe me kritikat për ritmin e reformave në procesin e mobilizimit ushtarak.
Një ushtar ukrainas, Oleksandr, e cilësoi vendimin si “gabimin më të madh të Zelenskyt gjatë presidencës së tij”, ndërsa protestuesit thanë se Fedorov kishte fituar besimin e ushtrisë dhe të qytetarëve falë rezultateve konkrete.
Para se të bëhej ministër i Mbrojtjes, Fedorov drejtoi Ministrinë e Transformimit Dixhital dhe krijoi “Ushtrinë IT të Ukrainës”, ndërsa më pas udhëhoqi programin “Army of Drones”, duke modernizuar përdorimin e dronëve në luftën kundër Rusisë.
Edhe pas shkarkimit, ai deklaroi se do të vazhdojë të kontribuojë në mbrojtjen e Ukrainës “përmes inovacionit, teknologjisë dhe organizimit”.
