Maqedonia e Veriut ka humbur grantin e Bashkimit Evropian nga fondet IPA, i cili ishte parashikuar për ndërtimin e linjës hekurudhore drejt Bullgarisë, për shkak të vonesave në zbatimin e projektit dhe mosrespektimit të afateve.
Sipas një projektligji të dorëzuar në Kuvend, kontrata për ndërtimin e hekurudhës nuk u nënshkrua brenda afatit të përcaktuar, çka bëri që fondet e Instrumentit të Ndihmës së Para-Anëtarësimit (IPA) të mos jenë më të disponueshme për këtë projekt.
Për këtë arsye, qeveria ka nisur procedurat për ndryshimin e modelit të financimit, me synimin që projekti të vijojë përmes kredive të miratuara më herët.
Dokumenti parashikon edhe ndryshimin e strukturës zbatuese të projektit, duke caktuar një institucion tjetër që do të jetë përgjegjës për zhvillimin e procedurave të tenderimit për ndërtimin e linjës hekurudhore.
Në Kuvend janë dorëzuar dy projektligje që heqin referencën se projekti financohet pjesërisht nga fondet IPA, duke reflektuar zyrtarisht humbjen e grantit evropian.
Linja hekurudhore drejt Bullgarisë është pjesë e Korridorit VIII, një nga projektet më të rëndësishme infrastrukturore në rajon, që synon të përmirësojë lidhjen hekurudhore mes Maqedonisë së Veriut dhe Bullgarisë.
