Këngëtarja shqiptare me famë botërore mori pjesë në Festivalin e Letërsisë në Londër, të organizuar në Southbank Centre, ku drejtoi biseda me autorë të njohur ndërkombëtarë. Krahas diskutimeve për librat, veshjet e saj nga shtëpitë luksoze Chanel dhe Prada u bënë pjesë e vëmendjes mediatike.
Në një artikull të publikuar më 27 tetor nga “Vogue Singapore”, gazetarja Anna Cafolla vlerëson mënyrën se si Dua Lipa ka shndërruar interesin e saj për leximin në një aktivitet kulturor, pa lënë mënjanë stilin që e karakterizon.
Të shtunën, në Royal Festival Hall, këngëtarja zhvilloi një bisedë me shkrimtaren e njohur britanike Zadie Smith, të përqendruar te romani i saj i parë, “White Teeth”, i botuar në vitin 2000.
Për këtë takim, Dua zgjodhi një fustan të kuq të ndezur nga koleksioni vjeshtë 2026 i Chanel. Veshja prej materiali të thurur kishte bel të ulur dhe detaje dekorative në bërryla e në pjesën e ijëve.
Ajo e kombinoi fustanin me çizme të zeza lëkure deri te gjuri, me lidhëse dhe taka të larta, nga marka Le Silla. Flokët e mbledhur pas dhe vathët e kuq me forma skulpturore plotësuan paraqitjen e saj.
Por mbrëmja solli një ndryshim të plotë stili.
Për bisedën me poetin dhe muzikantin sudanezo-kanadez Mustafa, Dua Lipa u shfaq me një kombinim të zi nga Prada, të përbërë nga një bluzë pa mëngë Re-Nylon dhe një fund të ngushtë.
Detaji që tërhoqi vëmendjen ishin këpucët e bardha prej sateni, të zbukuruara me pupla, të kombinuara me çorape pambuku të qëndisura me lule. Vathët e mëdhenj rrethorë dhe flokët e kapur në një topuz elegant i dhanë një tjetër pamje këngëtares.
Diskutimi me Mustafën u përqendrua te përmbledhja e tij poetike “Nour”, e vitit 2025, e cila trajton dashurinë, humbjen, besimin dhe përkushtimin.
Pjesëmarrja e Dua Lipës në festival lidhet me projektin e saj kulturor Service95 Book Club, përmes të cilit këngëtarja promovon letërsinë dhe zhvillon biseda me shkrimtarë nga vende e kultura të ndryshme.
Prej kohësh, ajo nuk e ka kufizuar aktivitetin publik vetëm te muzika, duke i dhënë hapësirë edhe leximit dhe bashkëbisedimeve për letërsinë.
“Vogue” ndalet gjithashtu te paraqitjet e saj të fundit jashtë skenës, duke përmendur veshjet e vjeshtës me të cilat është fotografuar përkrah bashkëshortit, aktorit Callum Turner.
Sipas revistës, ndërsa në përditshmëri Dua po zgjedh veshje më praktike për stinën, në skenë vazhdon të eksperimentojë me kombinime të guximshme.
Axhenda e saj letrare përfshin edhe një takim me këngëtaren dhe shkrimtaren e njohur Patti Smith.
Për Dua Lipën, librat dhe moda duket se janë kthyer në dy mënyra të ndryshme për të shprehur të njëjtin personalitet krijues. Dhe këtë herë, revista “Vogue” i ka kushtuar vëmendje jo vetëm asaj që këngëtarja veshi, por edhe asaj që kishte për të diskutuar.
