Një marrëveshje e mundshme mes Shteteve të Bashkuara dhe Iranit mund të kthehet në një goditje të rëndë politike për kryeministrin izraelit Benjamin Netanyahu, raportoi CNN, duke cituar burime izraelite dhe amerikane të përfshira në zhvillimet diplomatike.
Sipas raportimit, ajo që nisi si një operacion i përbashkët ushtarak mes SHBA-së dhe Izraelit kundër Iranit në fund të muajit shkurt, po shndërrohet gradualisht në një proces diplomatik të udhëhequr nga Uashingtoni, ku Netanyahu ka gjithnjë e më pak ndikim.
Burime izraelite i thanë CNN se Netanyahu ka shmangur kritikat publike ndaj presidentit Donald Trump, por në biseda private ka pranuar se Izraeli ka ndikim të kufizuar mbi rezultatin e negociatave mes Uashingtonit dhe Teheranit.
Sipas tyre, kryeministri izraelit ka kërkuar vazhdimisht vazhdimin e presionit ushtarak ndaj Iranit, duke argumentuar se kjo mund të çonte deri në dobësimin ose rrëzimin e regjimit iranian. Megjithatë, administrata Trump duket se ka zgjedhur rrugën e negociatave.
Shqetësimi kryesor i Izraelit lidhet me faktin se marrëveshja e diskutuar mund të mos adresojë çështjet që Tel Avivi i konsideron jetike, si rezervat e uraniumit të pasuruar të Iranit, programin e raketave balistike dhe rrjetin e aleatëve të Teheranit në rajon.
“Ekziston një shqetësim real se Trump mund të pranojë një marrëveshje të keqe të përkohshme”, citohet të ketë thënë një zyrtar izraelit.
Një tjetër pikë përplasjeje mbetet Libani. Sipas CNN, Irani po kërkon që çdo marrëveshje të përfshijë edhe armëpushimin në Liban, ndërsa Izraeli insiston të ruajë lirinë e veprimit ushtarak kundër Hezbollahut.
Raporti thekson gjithashtu se Netanyahu po përballet me presion të shtuar nga aleatët e tij të ekstremit të djathtë, të cilët kërkojnë një qasje më agresive ndaj Iranit dhe Hezbollahut.
Megjithatë, ndryshe nga përplasja e fortë që pati me ish-presidentin Barack Obama për marrëveshjen bërthamore të vitit 2015, Netanyahu nuk pritet të hyjë në një konflikt të hapur me Trump, pasi marrëdhënia me presidentin amerikan konsiderohet një nga asetet e tij më të rëndësishme politike.
Sipas CNN, përfundimi i luftës me Iranin dhe orientimi i administratës Trump drejt diplomacisë mund të ndikojnë edhe në trashëgiminë politike të Netanyahut, i cili për më shumë se tre dekada e ka ndërtuar profilin e tij si politikani që do të përballej me kërcënimin iranian.
Një sondazh i fundit në Izrael tregon se 45% e qytetarëve besojnë se situata me Iranin është përkeqësuar krahasuar me periudhën para 7 tetorit 2023, ndërsa pothuajse gjysma e të anketuarve mendojnë se Izraeli nuk po e fiton luftën kundër Iranit.
Në këtë kontekst, analistët vlerësojnë se një marrëveshje SHBA-Iran mund të ndryshojë jo vetëm balancat në Lindjen e Mesme, por edhe të ardhmen politike të vetë Benjamin Netanyahut.
