Familjarët e ish-krerëve të UÇK-së kanë reaguar pas vendimit të Dhomave të Specializuara në Hagë, që dënoi Hashim Thaçin dhe Jakup Krasniqin me nga 25 vite burg, Kadri Veselin me 18 vite dhe Rexhep Selimin me 13 vite.
Endrit Thaçi, djali i ish-presidentit të Kosovës, falënderoi shqiptarët që udhëtuan drejt Hagës dhe ata që vijuan të shprehnin mbështetje edhe pas shpalljes së vendimit.
“Falënderoj të gjithë vëllezërit dhe motrat shqiptare që udhëtuan dhe që pritën me orë të tëra për vendimin. Në veçanti, ata që nuk e ndalën zërin edhe pas vendimit”, shkroi Endrit Thaçi.
Ai tha se, sapo të kthehet, do t’i bashkohet edhe vetë zërit të mbështetësve.
“Kjo betejë nuk ka mbaruar. Ashtu si babi sot, që me kokën lart u përball me këtë ditë, edhe ne do të vazhdojmë përpara me kokën lart, me dinjitet dhe maturi”, shkroi ai.
Pas vendimit reagoi edhe Klestor Veseli, djali i Kadri Veselit. Mesazhi i tij ishte i shkurtër: “Të fortë jemi, të fortë duhet me qëndru – nuk kemi asgjë më shumë”.
Altin Krasniqi, djali i Jakup Krasniqit, reagoi pas dënimit të të atit me 25 vite burg, duke treguar se e kishte takuar menjëherë pas vendimit. Ai tha se Jakup Krasniqi falënderon shqiptarët për mbështetjen ndaj luftës së UÇK-së dhe se ish-krerët e saj janë “të fortë, krenarë dhe me ndërgjegje të pastër”. Sipas tij, vendimi është “një dënim për popullin dhe shtetin e Kosovës”, ndërsa theksoi se “UÇK-ja është dhe do të mbetet krenaria jonë”.
Gresa Krasniqi, vajza e Jakup Krasniqit, e cilësoi vendimin “padrejtësinë më të madhe të këtij shekulli”, duke deklaruar se familja nuk do të dorëzohet. “Na lënduan, por nuk na thyejnë”, ishte mesazhi i saj.
Aktgjykimi i shpallur këtë të mërkurë është i shkallës së parë dhe mund të apelohet.
